Sicaríʼ cusiene ti diccionariu diidxaʼ ciencia: laani nga «guiráʼ ni nanna binni de xiixa ni guca o de xiixa cosa ni nabé bidxagayaa binni, ne gúnnacabe de laani ora biʼniʼ estudiárcabe ni ne ora biʼyaʼ chaahuicabe ni». Riquiiñeʼ stale stipa para guiziidiʼ binni cani, peru cadi guiráʼ diʼ biaje ridxela binni guiráʼ ni racalaʼdxiʼ. Ora maʼ chiguni investigar ca científicu xiixa la? nuu tiru rusaacaʼ semana, beeu o iza. Cadi guiráʼ diʼ biaje ribeendúcabe ni racaláʼdxicabe, peru maʼ bíʼnicabe stale cosa ni racané binni. Guidúʼyanu chupa ejemplu.

Biʼniʼ ti compañía de Europa ti filtru de plásticu ni qué raca feu nagueenda ni zanda iquiiñeʼ para gusiá nisa nabiidiʼ. Nabé huaquiiñeʼ ca aparatu riʼ ora guizaaca ti desastre natural, casi xu roʼ ni guca Haití lu iza 2010.

Lu espaciu ni nuu zitu de Guidxilayú riʼ, nuu jma satélite ni riquiiñeʼ para gaca ni runibiáʼ binni casi sistema de posicionamiento global (GPS). Ca soldadu si nga biquiiñeʼ ni dxiqué, peru yanna maʼ stale binni riquiiñeʼ ni purtiʼ racaneni laacaʼ gánnacaʼ paraa nuucaʼ: casi cani rusá carru, avión ne barcu, cani rié de excursión ne cani rié guuzeʼ ndaaniʼ guiʼxhiʼ. Cadi dxandíʼ rudiʼnu xquíxepeʼ ca científicu ni biʼniʼ inventar ni purtiʼ racaneni laanu chindanu ra racaláʼdxinu jma nagueenda la?

Ñee riquiiñeluʼ ti teléfono celular, ti computadora o Internet la? Ñee huayacané xiixa medicina lii guiándaluʼ la? Ñee huayeuʼ lu avión la? Pa zacá ni la? zanda guininu maʼ huaquiiñeluʼ caadxi de ca cosa galán ni huayuni ciencia pur binni. Cani bizéʼtenu riʼ rusihuínnicani huayacané ciencia para ganda guibani binni xcaadxi galán.

Dede nagasi cayuuyaruʼ ca científicu xiruʼ zanda gúnicaʼ, ne cada dxi tiidiʼ jma cayuni estudiar chaahuicabe guiráʼ ni nuu lu universo ne lu Guidxilayú. Ca físico nuclear cayuni estudiar chaahuicaʼ átomo para gánnacaʼ xiruʼ nuu luni, ne ca astrofísico cabeecaʼ cuenta panda mil millón de iza maʼ gudiʼdiʼ, purtiʼ racaláʼdxicaʼ gánnacaʼ ximodo bizulú universo. Pur ca estudiu ni maʼ guca stiʼ chupa chonna de ca cosa ni bizéʼtenu riʼ, stale científicu riníʼ maʼ ñuuyacaʼ Dios ni ruzeeteʼ Biblia pa ñaca dxandíʼ nuube.

Nuu científicu ne filósofo ni racalaʼdxiʼ iquiiñeʼ ciencia para gusihuinni sti cosa. Ti escritor láʼ Amir Aczel na nuucabe «iquiiñecabe ciencia para gusihuínnicabe gastiʼ Dios». Ti ejemplu ni rusihuinni zacá ni nga ni guníʼ ti físico ni nabé runibiáʼ stale binni laa lu guidubi Guidxilayú, hombre riʼ guníʼ: «Gastiʼ nin ti prueba ni gusihuinni dxandíʼ nuu ti Dios ni bizáʼ guiráʼ ni nuu lu universo ne ndiʼ nga razón ni caquiiñenu para guininu cadi dxandíʼ diʼ nuu dios». Xcaadxi riníʼ: «Pa guni crenu dxandíʼ Dios ni ruzeeteʼ Biblia nga biʼniʼ guiráʼ cosa la? zeeda gácani casi ora  ñuni crenu “magia” ne naquiiñeʼ gánnanu qué runi cré ciencia pa raca milagru». *

Peru galán guinabadiidxanu: ñee maʼ bidxela ciencia modo guicabi guiráʼ ni racalaʼdxiʼ binni ganna de universo la? Coʼ xa. Nécapeʼ maʼ zitu nga dede ra maʼ yendá ciencia, nuu stale científicu ni rudii cuenta qué zanda diʼ guiénecaʼ caadxi cosa o qué ziuu dxi guiénecaʼ ni. Guidúʼyanu xi guníʼ Steven Weinberg, premio Nobel de Física: «Qué ziuu dxi gunibiáʼ chaahuinu guiráʼ xixé ni nuu». Ne sicaríʼ bicaa profesor Martin Rees, astrónomo real de Gran Bretaña: «Nuu caadxi cosa ni qué ziuu dxi guiene binni guidxilayú». Nuuruʼ stale cosa ni qué runibiáʼ chaahuinu, cásica ti célula nahuiiniʼ zaqueca universo naroʼbaʼ stinu riʼ. Raríʼ nuu caadxi ejemplu:

• Dede nagasi qué ganda diʼ guiene chaahuiʼ ca biólogo xipeʼ nga rizaaca ndaaniʼ ca célula: ximodo riquiiñecani energía, ximodo rúnicani proteína ne ximodo raca dividir cani. Ndiʼ nga caadxi de ca cosa nagana ni qué ganda gusiene ciencia.

• Lu intiica cosa gúninu rudiʼnu cuenta nuu ti stipa ni láʼ gravedad, peru dede nagasi nuu stale cosa ni qué randa riene binni de laani. Qué riene chaahuiʼ ca físicu ximodo rigubayú gravedad laanu ora richésanu o ximodo racaneni Beeu para cadi guiree lu órbita stiʼ ora maʼ cudii buelta Guidxilayú.

• Ca cosmólogo nacaʼ qué rihuinni diʼ 95% de ni nuu lu universo ne qué gapa diʼ ca científicu ti aparatu ni ganda uguubiaʼ ni. Ribee lácabe ca cosa ni qué rihuinni sicaríʼ: materia cahui ne energía cahui. Peru, xi laacani yaʼ. Guirutiʼ qué ganna.

Ne laaca nuuruʼ stale cosa ni qué ganda gusiene ca científicu. Sicaríʼ guníʼ ti neurólogo: «Jma stale cosa nga ni qué gánnanu que cani nánnanu. Para naa la? jma galán chuulaʼdxiʼ ti científicu guiziidiʼ ne dede guidxagayaa ora ganna xiixa que gaca ti binni ni qué riuu razón».

Nga runi, pa riníʼ íqueluʼ zanda gusaana de guni crenu Dios ne gusaana de guni crenu ni rusiidiʼ Biblia purtiʼ si rábiluʼ maʼ nanna ciencia guiráʼ cosa la? bietenalaʼdxiʼ ndiʼ: caadxihuiiniʼ si cosa nga maʼ nanna ca científicu lade guiráʼ ni nuu lu universo, napa ndácabe stale aparatu naroʼbaʼ para guni investigárcabe stale cosa. Sti razón ni rusihuinni jneza ni bizéʼtenu riʼ nga ni guníʼ Encyclopedia Britannica ora cuzeeteʼ de historia stiʼ astronomía: «Maʼ gudiʼdiʼ biaʼ tapa mil iza de cayuni investigar astronomía ni nuu lu universo, peru dede nagasi cayácaruʼ nagana para guiénenu ni, cásica gúcani nagana para ca binni de Babilonia». Yanna, ñee zusaana de guinabadiidxanu xcaadxi cosa purtiʼ si qué ganda guicabi ciencia caadxi cosa ni jma nagana la?

Laadu, ca testigu stiʼ Jiobá, runi respetardu derechu napa binni para guʼyaʼ xi guni cré. Rúnidu stipa para gúnidu ni na conseju stiʼ Biblia riʼ: «Lagaca [binni riene] dede izaabi stiidxa tu» (Filipenses 4:5). Runi invitardu lii guiziidiluʼ jma ti ganda gúʼyaluʼ ximodo biaʼsi riree ni rusiidiʼ ciencia né ni zeeda lu Biblia, de racá maʼ quíxheluʼ xi guni creluʼ.