Guiráʼ iza runi imprimirdu ne rusaananedu binni millón de Biblia ne xcaadxi publicación ni cusiidiʼ de laani. Rucuidu sucursal ne nápadu imprenta ni cayuni dxiiñaʼ ndaaniʼ cani lu guidubi Guidxilayú. Nexheʼ chaahuiʼ dxiiñaʼ rúnidu ndaaniʼ mil congregación ne ridagulisaadu caadxi lugar ni qué gapa stale luju ni láʼ Yoo stiʼ Reinu. Tu riguixe guiráʼ gastu ni raca riʼ yaʼ.

Guiráʼ dxiiñaʼ rúnidu riaxa cani né bueltu ni rudii binni biaʼ náʼ ladxidóʼ (2 Corintios 9:7). Lu iza 1879, lu guiropa númeru stiʼ revista Zionʼs Watch Tower, modo biree lá revista riʼ dxiqué, bizeeteʼ: «Para laadu la? JIOBÁ nga cayacané gaca [revista riʼ], ne biaʼ tiempu gacanebe gaca ni, qué ziuu dxi guinábadu guna, ne qué ziuu dxi guinábadu binni gacané laadu». Dede yanna rúnidu zacá.

Pa nuu tuuxa racalaʼdxiʼ gudii bueltu zanda guseendaʼ ni ra nuu tobi de ca oficina stidu o zanda cuʼbe ni ndaaniʼ ca cajahuiiniʼ nuu ndaaniʼ ca Yoo stiʼ Reinu stidu. Qué rinábadu diezmu, guna ne qué ruquíxedu pur guiráʼ ni rúnidu ne nin pur ca publicación stidu. Guirutiʼ riguixe laadu pur rucheechedu diidxaʼ, pur rusíʼdidu ndaaniʼ congregación nin pur rucuidu ca yoo ni riquiiñedu para guni adorardu Dios. Rinándadu conseju bidii Jesús: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu» (Mateo 10:8). Nin tobi de cani runi dxiiñaʼ ndaaniʼ oficina central ne ca sucursal stiʼ ca testigu stiʼ Jiobá qué riáxacaʼ dede nin cani nuu lu Grupu ni Zaniruʼ.

Laaca racanedu ora gaca xiixa desgracia. Ca xpinni Cristu ni bibani lu primé siglu laaca gucanecaʼ ora guyuu guendanagana (Romanos 15:26). Yanna riʼ, laaca racanedu cani guniná xiixa desgracia laa gaca chaahuiʼ lidxi, gapa ni gó, ni gacuʼ ne runi tenderdu cani caquiiñeʼ doctor. Laaca runi chaahuidu ca Yoo stiʼ Reinu ora gaca feu pur xiixa desgracia.