TEMA STIʼ PORTADA | XI RINÍʼ IQUE DIOS DE GUERRA
Modo biʼyaʼ Dios guerra dxiqué
Nabé cayacaná guidxi riʼ. Stale biaje gunábacabe Dios gacané laacabe, peru cadi casi zécabe bicabi Dios laacabe. Guidxi riʼ nga Israel, ti guidxi ni gulí Dios dxiqué. Ne guidxi biquiichináʼ laacabe nga Egipto, ti guidxi nabé nadipaʼ (Éxodo 1:13, 14). Guleza ca israelita que stale iza para gunduuxeʼ Dios modo cuquiichináʼ ca egipciu que laacaʼ. Dede bidxiña dxi bilá Dios laacabe (Éxodo 3:7- 10). Biblia na Dios peʼ gupa guerra né Egipto. Bicaalube guidxi que né 10 plaga ne binitilube faraón ne ejércitu stiʼ ndaaniʼ nisadóʼ Xiñáʼ (Salmo 136:15). Jiobá gudinde pur xquidxi, casi runi ti hombre nabé nadipaʼ (Éxodo 15:3, 4).
Ra gudindené Dios ca egipciu que, rusihuinni ni nuu biaje jneza ruuyaʼ Dios ca guerra ca. Laaca guyuu ora bidiibe lugar tindené guidxi Israel xcaadxi guidxi. Ti ejemplu de laani nga dxi biʼniʼ mandarbe laacaʼ tíndenecaʼ ca binni de Canaán, purtiʼ nabé malu laacaʼ (Deuteronomio 9:5; 20:17, 18). Cumu nabé malu ca filisteu la? biʼniʼ mandarbe rey David tindené laacaʼ ne dede gúdxibe laa ximodo guni para guni ganar (2 Samuel 5:17-25).
Ca relatu zeeda lu Biblia rusihuínnicani ora maʼ cuquiichinácabe o maʼ cayuninácabe ca israelita que, rudii Dios lugar gaca guerra ti ganda gulá ca xpinni ti cadi gusaanacaʼ de guni adorarcaʼ laabe. Peru nuu chonna cosa ni naquiiñeʼ gánnanu ora rudii Dios lugar gaca ti guerra casi chiguidúʼyanu lu tema riʼ. Xi laacani yaʼ.
-
DIOS SI NGA GUNÍʼ TU CHEʼ LU GUERRA. Ti biaje, gudxi Jiobá ca israelita: «Cadi naquiiñeʼ diʼ tíndetu». Guniʼbe zaqué purtiʼ laapebe chitíndebe pur laacaʼ (2 Crónicas 20:17; 32:7, 8). Stale biaje bíʼnibe zacá, casi dxi gudindenebe ca egipciu que. Peru guyuu biaje laaca biʼniʼ mandar Dios xquidxi tinde para guni ganar layú ni maca gúdxibe laacaʼ chicaacaʼ ne tíndecaʼ para cadi guiaaxha cani (Deuteronomio 7:1, 2; Josué 10:40).
-
DIOS SI NGA GUNÍʼ PORA GUZULÚ GUERRA. Gupa xidé guleza ca xpinni Dios dede ora gábibe laacaʼ pora maʼ zanda tíndenecaʼ ca binni malu nuu ndaaniʼ ca guidxi ni nuu gaxha de laacaʼ. Pa qué gabi Dios laacabe chécabe la? qué ziécabe. Ne pa gúnicabe ni de laasícabe, qué racané Dios laacabe lu guendaridinde que. Lu Biblia rieeteʼ ora chécabe lu guerra sin gabi Dios laacabe gúnicabe ni, qué ribeendúcabe ni galán. *
-
Neca gupa Dios guerra né ca guidxihuiiniʼ stiʼ Canaán, nuu binni bilabe xquendanabani, casi Rahab ne familia stiʼ
QUÉ RIUULAʼDXIʼ DIOS GATIʼ BINNI. Ra nuu Jiobá «cadá guendanabani» ne laabe bizaʼbe binni guidxilayú (Salmo 36:9). Riuuláʼdxibe nga guibani binni ne cadi gatiʼ. Peru nuu tu laa ruyubi modo guniná stobi dede guuticaʼ (Salmo 37:12, 14). Nuu biaje huadii Dios lugar gaca guerra para gunduuxeʼ guendaquéiquiiñeʼ ni cayaca. Peru biaʼ tiempu bidiibe lugar cheʼ ca israelita lu guerra, gúcabe nachaʼhuiʼ ne gúpabe paciencia ca xhenemígucaʼ (Salmo 86:15). Bisihuínnibe ni ora gúdxibe ca binni de Israel ante tíndenecaʼ ti guidxi, primeru naquiiñeʼ gábicabe laacaʼ qué racaláʼdxicabe tíndecabe, ti zacá ganda guchaacaʼ xpiaʼcaʼ ne maʼ cadi gaca guerra que (Deuteronomio 20:10-13). Ca diidxaʼ riʼ rusihuinni cani ni maca guníʼ Dios: «Qué riechediáʼ ora gatiʼ binni malu, sínuque riecheʼ ora guchaacaʼ modo laacaʼ ne guibánirucaʼ» (Ezequiel 33:11, 14-16). *
Lu tema riʼ bizíʼdinu, dxiqué biʼniʼ mandar Dios gaca guerra para gunduuxeʼ ca guendaquéiquiiñeʼ ne cani cuquiichináʼ binni. Peru Jiobá Dios si nga napa derechu guiníʼ pora maʼ zanda chécabe lu guerra ne tu cheʼ luni ne cadi binni diʼ. Ne laabe qué nidíndebe para ñuninabe stobi dede nuxhiibe rini; purtiʼ nanaláʼdxibe guendaridinde (Salmo 11:5). Peru, ñee bichaabe modo riníʼ íquebe lu primé siglu que dxi beeda Jesucristu, Xiiñibe, lu Guidxilayú riʼ la?
^ párrafo 7 Ti biaje gudxi Dios ca israelita cadi gucaalucaʼ ca amalequita ne ca cananeu, peru qué nuzuubacaʼ diidxaʼ, ngue runi biníticaʼ (Números 14:41-45). Stale iza despué, guyé rey Josías lu ti guerra sin ñabi Dios laa guni ni, ne pur ngue guti (2 Crónicas 35:20-24).
^ párrafo 8 Ca binni de Canaán si nga qué rábicabe ca diidxaʼ que ora maʼ chitindenécabe laacaʼ. Xiñee yaʼ. Purtiʼ gupa ca binni que tapa gayuaa iza para nuchaacaʼ modo laacaʼ. Nabé maʼ malu laacabe ne maʼ qué ziuu dxi guchaacabe (Génesis 15:13-16). Ngue runi, binduuxeʼ ca israelita que laacabe. Peru guyuu binni de guidxi que ni bichaa modo laa ne bilá (Josué 6:25; 9:3-27).
Laaca zándaca ziuuláʼdxiluʼ ca ndiʼ
CANI ZEEDA LU BIBLIA
Gucuaa ca israelita guidxi Canaán
Dxi guyuu ca israelita guidxi Canaán, xiñee bitiidilaʼdxiʼ Jiobá Rahab ne binnilidxi Jericó.
TORRE STIʼ NI RAPA
«Bixhá Dios stonda be»
Historia stiʼ Rahan, prostituta que, rusihuinni guiráʼ binni risaca nezalú Dios. ¿Xi rusiidiʼ ejemplu stibe laanu yaʼ?
TORRE STIʼ NI RAPA
Ora runi castigar Dios binni: Ñee rihuinni malu laabe la?
Para guicábinu pregunta riʼ la? guidúʼyanu chupa ejemplu ni riete lu Biblia: dxi bisaba Dios Diluviu tiempu stiʼ Noé ne dxi guti stale cananeu.
