Nabeza Zarina Rusia dxi guyuunisa ne guca testigu de Jehová. Despué bibiguétabe xquídxibe, Asia Central. Naguixhe íquebe gusiidibe guiropaʼ dxaapahuiiniʼ stibe ni maʼ biziidibe de Biblia. Cumu qué gápabe stale bueltu, yendézabe ra nuu bixhózebe ne jñaabe, laaca nabeza bizáʼnabe ne xcuñádabe raqué, ne ndaaniʼ ti yoo huiiniʼ si guyuu guirácabe. Gudxi bixhoze ne jñaa Zarina laa cadi guiniʼné ca xiiñiʼ de Biblia ne laaca gúdxicabe ca dxaapahuiiniʼ que cadi guiníʼnecaʼ jñaacaʼ de religión.

 Guníʼ ique Zarina ximodo gusiidiʼ ca xiiñiʼ de Jehová (Proverbios 1:8). Ngue runi gunábabe Jehová gacané laabe ne gudii laabe guendabiaaniʼ. Despué bireenebe ca xiiñibe para gúʼyacaʼ guiráʼ ni bizáʼ Dios. Ra bíʼnibe ni, gucaneni ca xiiñibe chuuláʼdxicaʼ gánnacaʼ jma de Dios ni bizáʼ guiráʼ ni nuu.

 Despué bidxela Zarina sti modo gusiidiʼ ca xiiñiʼ né libru Xipeʼ ndiʼ cusiidiʼ Biblia * Rucaabe ca párrafo ne ca pregunta que lu caadxi nota ne rucaabe caadxi diidxaʼ para gacanebe laacaʼ guiénecaʼ ni cayuundacaʼ. Despué rucaachibe ca nota ne ti lápiz xaʼnaʼ lavadora, ni nuu ndaaniʼ bañu. Ora riuu ca xiiñibe raqué la? ruundacaʼ ca nota que ne rucaacaʼ respuesta stiʼ ca pregunta que.

 Né ni biʼniʼ Zarina riʼ la? gunda biindané ca dxaapahuiiniʼ chupa capítulo stiʼ libru Xipeʼ ndiʼ cusiidiʼ Biblia ante chindézacaʼ sti lugar. Ora bidxaacabe de yoo, gunda bisiidiʼ Zarina laacabe sin nucueeza guirutiʼ laa. Lu beeu octubre de 2016, guyuunisa guiropaʼ dxaapahuiiniʼ stiʼ Zarina ne guizáʼ nayecheʼ nuu ca xiiñibe purtiʼ bisiidiʼ jñaacaʼ laacaʼ de Biblia.