LECCIÓN 6
A dia yelarbezalachhi ki bene chi gótike
1. Bí yelarbezalachhi dia ki bene chi gótike
Katí Jesús gzué Lichhileyó, gzuá to amigo kíe, gxhilawe Lázaro. Gzué Betania to yechhi dia gaagoze Jerusalén pero to dza gotie. Katí Jesús bchhinhe lo yoʼo kíe, chizeaj tapa dza natie. Tzaxhen zeajlenhe Marta len María nigolha zan Lázaro, Jesús guíaje rhua yerhobá, na stikadoʼ bdóbika bene. Bhenka kuenda, gákati yatzajyolaj gzuá Marta len María katí blékene Jesús bochisa bospanhe bene zanke. Blaba Juan 11:21-24, 38-44.
Lo Biblia rtzalaj rson chhiágazi. To naka yelarbezalachhi tan yiyasa yebán bene chi nátike. Marta byédiene tan Jeobá nokiebe yochise bene chi nátike na yizuakaké Lichhileyoni. Blaba Job 14:14, 15.
2. Bí rhaka ki ka bene katí rhátike
Dios gochhe Adán: «Bixhte yoo nákalo len bixhte yoo yákalo» (GÉNESIS 3:19)
Rhoʼ benachi nákarha bixhte yoo (Génesis 2:7; 3:19). Nákarha bélha na bi dzerha ta kebi rhati. Katí yobi yíkiajrha rhati rheniti diarha pensarhe kierha tanka bene rhátike birhe bi rnísiekene nika rheguirlake. Lo Biblia rne: «Bene nabanke nézekene wátike; na bene chi nátike, leke birhe bi nézekene, níkarhe bi dia kieke» (Eclesiastés 9:5). Tanka katí Lázaro beyasa bebanhe, kebi bi gdixhajeʼ chen bí goka kíe. Blaba Eclesiastés 9:10.
Bálake rhékiekene dia infierno ga rsakayá Dios leke katí chi gótike, pero bi naka ka rneke naʼ. Ka chi byédierha, bene chi nátike birhe bi rnísiekene, tanka tan rheajleke dia infierno naka gxhiyeʼ le rhon na bene rpáguekene Dios ta bi rhonhe, len bi bata rzalachhie gonhe kan. Lo Biblia rne: «Na chi bhenke ga tzeajneláchhike Tófet [...], kuenda gzéguike xhinke lo guiʼ, ta [nedi Jeobá] bi bata benha mandado len ni ka rdeze lo yíyiajlo laxhdawa» (Jeremías 7:31).
Byo video Nákaʼ dzaʼ ka bene chi nátike
3. A waka ktzalajlenrha bene chi nátike
Bene chi nátike birhe rheenkene nika rtzálajke (Salmo 115:17). Pero dzaka ángeles malha rgónketa kuínketa bene chi nati na rtzalajlenkata bene (2 Pedro 2:4). Tanka Jeobá rlene ziʼ ktzalajlenrha len bene chi nátike. Blaba Deuteronomio 18:10, 11.
4. Nó bene yiyasa yebanke
Millónkane bene chi gótike yizuakaké Lichhileyoni, lenté bene bi bhenbeʼke Jeobá na bhenke ta malha. Lo Biblia rne: «Wata yelarheyasa rheban ki bene wen len bene malha» (Hechos 24:15). Blaba Lucas 23:43.
Bene yiyasa yebanke weyédiekene talí ki Dios, waka kslueke rxhenláchhike Jesús len gsenágake kíe (Revelación [Apocalipsis] 20:11-13). Chen kan gonke, wezike banheza to yelanabán tzalasa lo Lichhileyoni. Blaba Juan 5:28, 29.
5. Bí rsedie rhoʼ ki Jeobá yelarheyasa rheban
Tan yochisa yospanhe bene goti le rlué yelarheke len yelawen ta bi rhedólarha ki Jeobá. Chaʼ Dios kebi kséle Xhiʼinhe deguetie nia kierha, bi dia yelarbezalachhi. Naxha lí nonho rheʼenelo slelho katí yiyasa yebán ka bene. Blaba Juan 3:16 len Romanos 6:23.
