WIRIKAPAI 7
Ga Mbori Ngbii Nga Gine?
1. Ga Mbori Ngbii nga gine?
Gine nasa Yesu ko rẽ kadu ni Bakindo?—MARAKO 1:40-42.
Ga Mbori Ngbii nga gako Kindo, nga gu zogarago du ngbangbaturũ yo. Si nika diaba agu azogarago nga ga awiri aboro dunduko na ki sa gupai Mbori akpinyemuhe si mangi ngbangbaturũ yo na auru kpotosende no. Gu pangbanga du tipa ga Mbori Ngbii nga wene pangbanga. Fuo regbo tooni, ga Mbori Ngbii nika mbiisa gu gomoro du aboro nani tipa wene zogarago. Si nika koda agu aboro dunduko du auru kpotosende i du nikpamiakpamiayo.—Mo gedi Daniere 2:44; Matayo 6:9, 10; 24:14.
Yekova asia Wiriko nga Yesu Kristo ko du nibakindo Gako Kindo.—Mo gedi Yugoti 11:15.
Mo bi gu vidio re Ga Mbori Kindo Nga Gine?
2. Tipagine du Yesu ti ni nigu boro rẽ kadu ni Bakindo?
Wiri Mbori nga gu boro rẽ kadu nibazogo bambiko ko nga boro wene sino na ko namangapai niruruhe na ko naida apai nimangi niruruhe. (Yoane 1:14) Ko a na ome tiko ka undo aboro bambiko ko nika sungo ngbangbaturũ yo kini zogarago ku auru kpotosende. Fuo zinga Yesu be kpio, ko aga ku ngbangbaturũ ki sungu ku kumbabe Yekova yo kini sungudi gu regbo ko nika da nibakindo. (AEbere 10:12, 13) Na regbo aima ye ki da Mbori ki fu tandu fuko ko tona zogarago.—Mo gedi Daniere 7:13, 14.
3. Ada nika zogarago na Yesu?
Badona aboro kinaho i ayambayo nga “ziazia yo” nika zogarago na Yesu ngbangbaturũ yo. (Daniere 7:27) Bambata gu ziazia aboro re nangia ga Yesu ruru amokedi. Yekova nasia gu ziazia aboro re kindi nga akumba na adee da ku awere. Wakina Yesu, i nazinga be kpio na gu kpoto nga ga toro.—Mo gedi Yoane 14:1-3; 1 AKorindo 15:42-44.
Bange aboro wai naga ku ngbangbaturũ yo? Yesu ayawee i nga “umba rika aboro.” (Ruka 12:32) Bangeyo nikadu dunduko nga 144,000. I nika zogarago na Yesu ku auru kpotosende.—Mo gedi Yugoti 14:1.
4. Ginipai namangi ho Yesu atona zogarago ni?
Yesu atona zogarago nibakindo ga Mbori Kindo rogo gu garã nangia 1914. * Gu bambatapai Yesu amangihe ko nada nibakindo nga ka ba Satana na gako adaimona ku sende no. Satana aima du na bakere zinga gbe na ko ki tona ka ye na fudifudiapai ku auru kpotosende dunduko. (Yugoti 12:7-10, 12) Tona ti gu regbo re kada ku awere, agu arungo nga ga aboro nakio kina kumbatayo. Avura, angbongi, riri akaza, na abazigizo nga agu apai dunduko nayugo gupai nga, ga Mbori Kindo ima mbeda ka ye na ariapai ku auru kpotosende no.—Mo gedi Ruka 21:7, 10, 11, 31.
5. Ginipai ga Mbori zogarago amangaha?
Ga Mbori zogarago nakpamia bakere rimbasa aboro dagba arikaaboro dunduko na gu sunge tungusapai namanga rogo zegino dunduko. Dungu amirioni aboro nada ni avuru Yesu. Ga Mbori zogarago nika bandayo abanda ho si nika gbarasa gi gbegberẽ zegino re ni. Sidu tie, agu aboro naida ka gbia undo be ga Mbori zogarago, si naida i wiriki wai rengbeyo kadu ni avuru Yesu.—Mo gedi Yugoti 7:9, 14, 16, 17.
Vuru agarã 1,000, ga Mbori Ngbii nika manga ga Mbori ringbisipai tipa aboro. Kpotosende dunduko nika da niparadizo. Niyangaraha, Yesu nika karaga zogarago fu Bako. (1 AKorindo 15:24-26) Ya mo boro ho mo aberãpa gumbapa ga Mbori Ngbii funi?—Mo gedi Atambuahe 37:10, 11, 29.
^ ekeb. 6 Tipa ka ino wai nzunzu Ziazia Kekeapai aima gumbapa gu garã nga 1914 kumbatayo, mo bi gu buku nga Gini Apai Nzunzu Ziazia Kekeapai Ayugoho? ti kpehe 215-218.
