BAMBATA SANAHE
Da Nga Mi?
GINIPAI KA MO MANGIHE?
Mo berẽnga kurii gi kpiapai re: Nagene ndu ki ngbe soda ki sungu kaa mbiraha ri ki gi fugo boro giiri yo ní niya:
“Gini sungu mo ane kaa mangaha?”
Nagene aria tiri ki bi nakureari nga Nyemuse. Nyemuse ya fu Nagene: “Ya mo gude du nga mo nambira kina soda?” Fuoho, ri aria tiri ki ndu ki ye na agizaza buda beri ue ki fu gu sa fu Nagene.
Nagene naida ka káha ono nakureari du nga Nyemuse. Nagene aidanga nakureari berẽ gupai nga sunge tiri te te. Nagene berẽ gupai nga wangia Nyemuse ruru boro ono ri kini mbiri buda ambira, gure nga gbegberẽpai ngaha ka mbira buda te. Nagene ya ku kpotoriyo, ‘kungbo buda du gbua. Anga si wa dia kerengua te.’
Ka singia mo du du rogo pai wa Nagene, ginipai ka mo mangihe?
MO RUNGA KA BERÃ!
Tipa ka manga ruru diaberã rogo gi bangiriba re, si naida mo ini da aino nga mo. Pa ino mo da nga mo na agu arugute mo andu kutini ima rengba ka undoro. Ho mo aino da ni nga mo, mo nadu na ome tiro ka banda ga raka kuba gupai nga aboro naamanga diaberã foro.—1 AKorindo 9:26, 27.
Wai rengbe mo ka gbia gu ngbatunga ome re? Karagapai kuti agi asanahe naye re nga wene diandue.
1 GINI APAI NYAKI MI ROGOHO?
Pa ino mo gu rengbanapai du mo na ni gbiati gu wene asino du tiro nika nyakasa gamo kido.
KPIAPAI ROGO BAIBIRI YO: Gu mokedi nangia Pauro ake gupai nga: “Ka fugore avura gberã vurũ, mi adu nga wo rogo inahe yo te.” (2 AKorindo 11:6) Gu wene inohe nga ga Ziazia Kekeapai Pauro adu na ni aima rengba ka undoko ko ru nyanyaki ti gu regbo ko adu ngbapai yo be aboro. Ko aambunga gene fu gayo gbegberẽ afugo si zeresi gu kido ko adu na ni te.—2 AKorindo 10:10; 11:5.
MO WISIGINGO TIRO. Rogo gi ba du kusende re, mo kenga pa gu birĩ-sunge watadu tatamana du mo na ni.
Mo sakingo pai tipa gu bangua sino du tiro. (Ni kpiapai, mo naangerafuo aboro? Mo nga boro weneringise? Mo ni gu boro aboro akido kuti ni? Mo ni gu boro nabanda regbo?)
2 GINI APAI RUNGBURA MI ROGOHO?
Ka mo mbu gamo arungbura si moipai kurii ga raka si ima rengba ka dia gu wene asino du tiro kusayo.
KPIAPAI ROGO BAIBIRI YO: Pauro aima ino pa gako arungbura. Ko ake gupai nga: “Rago nangba ti re na ga Mbori rugute ku kpotore yo. Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai.”—ARomo 7:22, 23.
MO WISIGINGO TIRO. Gini ngbatunga arungbura du tiro si aida mo ini wai ka mangapai sani?
3 GINI ASÁSÁ DU BERE?
Ya mo mo rengbe ka bita ku rogo tarambiri ki ya fu bakama tarambiri wẽ ko nike kirikiri na gako tarambiri daho gako giazi nika nyasa ni? Gure du ni pa mungo na si rengbe ka dia bakere marã!
Ginipai gi kpiapai re ayugoho foro? Asásá nasa ro mo ini wari ga raka andu ni na ka mo akenga ni bakirikiri ya. Mo nadu na pai bero mo aida ka da ti ni na ki sogima wai ka da ti ni.
KPIAPAI ROGO BAIBIRI YO: Pauro aya wẽ ko aoranga wa gu boro naora gbua te. (1 AKorindo 9:26) Kuba gupai nga Pauro mbu apai si namanga fuko rogo gako raka zanga asásá, ko amoi asásá na kini raki kutini.—AFiripoio 3:12-14.
MO WISIGINGO TIRO. Rogo gi ba du kusende re, mo ke pa asásá biata nga gu mo aida ka da ti ni rogo gu garã naye re.
4 GINI APAI MI NAIDI KUTINI?
Ho du mo ni na agu arugute mo andu kutini, mo wa kina gu ngua nga gu na ru nyanyaki ti regbo bavugumo
Ka pai adunga ho mo aida kuti ni ya, mo nika du ni boro berãpai ue. Wakina wai nvua naasaka rangiru, mo ima rengba kaa saka tiro tipa akuaro idi na mo, na gipai re nayugo gupai nga mo ainongo da nga mo na gini arugute mo andu kutini te.
Ono ho mo amanga gamo apai ni ringbisihe kuti ga ida, mo nanye ni gu ngbatunga boro nga mo, ka aboro vura kaa manga kina gine vurũ.
KPIAPAI ROGO BAIBIRI YO: Ho gu nebi nangia Daniere adu ni kindi ni wiri paranga, ko ada kuti gupai “kpotoko yo” nga ko nika mangapai kuti ga Mbori andiko, ka i vura kpara ko ti agumeko vurũ. (Daniere 1:8) Wa ko amangihe wo, ko anye ni gu ngbatunga boro ko aidi kadu nga ní.
MO WISIGINGO TIRO. Gamo aida nga gine? Ni kpiapai: Ya mo mo idi kuti Mbori? Ka si duwo, tipagine? Gini agopai nayugo gupai foro nga Mbori kina ti ni?
Ya mo mo idi kuti gupai nga ga Mbori arugute tipa kina ga undo? Ka si duwo, tipagine?
Ni yangaraha tie, mo naida kadu wa gine—wa gu kpe nazama na kini ugu ni ipo be faa uru watadu wa gu ngua nga gu naru nyanyaki ti regbo kere bavugumo? Mo nyakasi gamo ida kadu wa kina gu ngua re. Si nika undoro mo karagapai kuti gu sanahe nga, Da nga Mi?
Gere Ima Rengba a ka Ngba Tiro
GUPAI AKUARO AGUMBAHA
Da du Nga Mi?
Ino ani karagapai kuti gi sanahe re ima rengba ka undo rani ani du na diabese rogo akpakarapai yo.
