Rogatise nakusa vovo aborokporo. Wa vura duhe nga mo nikaa kpinyemu avunguro akpi kindi na kini irisiyo, diaro watadu kumbamo nga gu boro nyaki pani foro gbe auru kpotosende. Kura agumeroni kinaho rengbehe kadu ni mbumbuhe fuyo i idi kuti gupai nga wo du duhe. Ono agu arugute nga ga Ziazia Kekeapai rengbe ka undo roni oni moi bangbanda, tipa wa ka oni banda zereda na agumeroni wa oni aˈasada ka nyakasa gaoni vovo kporo.

GUPAI ZIAZIA KEKEAPAI AGUMBAHA: “Mo írisi bamo na namo.” (AEfeso 6:2) Ka mo vura da ni kuru boro, si naida mo niirisi avunguro airisa. Mo tingidi gupai nga si naida aida a gamo badiarogatise niberẽpa avunguni. “Nyemuse akpi nga he te,” sidu, ka mo bingo ho nibasa nga kerepai nika manga mbiko gu pagume du dagbani na avunguni ya.​—1 AKorindo 13:4; AGaratio 5:26.

GUPAI RENGBE MO KA MANGAHA:

• Mo mbu gumba gu ngbatunga afugo duwa, “Agumero nabisira pare ti aregbo dũ” watadu “Aregbo dunduko rago angbanga ti namo na agu apai mi amangaha ya”

• Mo asadi ka bi apai wa gu gamo badiarogatise abihe

GUPAI ZIAZIA KEKEAPAI AGUMBAHA: “Si du boro nihe bani ti ni na nani, ki ka kuti diani, i ki du wa boro sa.” (Bambata Pai 2:24) Ho mo amanga rogatise ni, avunguro rengbe kaa bi gupai nga mo kindi tiibeyo, na i rengbe ka ida ka rimiso tiyo ku rogo agu apai nga ga gaoni ramukporo susi gu si aidaha.

Mo du na gamo badiarogatise si aida oni sakipa gu ngbanda oni ka maaha fuyo na ki sakihe fuyo ngba wene gene. Oni rengbe arengba ka fura na yo ziazia ono ngba wene gene. (Asanza 15:1) Umbasitise, zera, na gbanga hipai rengbe ka undo roni oni sonosi dawedawe pagume na agumeroni na kini “hi pai fu akuaroni ni nyemuse.”​—AEfeso 4:2.

GUPAI RENGBE MO KA MANGAHA:

• Ka si du nga rago angbanga tiro na wai agume narimi ku rogo agu apai nga ga gaoni ramukporo te, mo pehe fu gamo badiarogatise oni fura riihe ho du rago ni ni zezeredihe

• Oni dakuti gupai oni ka mangaha tipa gipai re