Ho mo atona raka ni na gamo badiarogatise, dungu kpakaraapai rengbe arengba ka kura. Si rengbe ka ye mbiko wai oni aberã watadu wai oni abi apai rogo raka. Watadu kpakaraapai rengbe ka ye rogo kura ba watadu be agu apai oni ainongo nga si nika manga ya.

Si rengbe kadu ni taatapai boro asadi ka ora be gu kpakarapai kuru, ono Ziazia Kekeapai nazungadi rani ani asadi ka mbakada gu kpakaraapai du dagbarani kuba gupai nga ka ora behe. (Matayo 5:23, 24) Oni rengbe ka mbakada tagbagaapai ni manga oni sunge na agu arugute nga ga Ziazia Kekeapai.

GUPAI ZIAZIA KEKEAPAI AGUMBAHA: “Rago fura [kinaho].” (Batungusipai 3:1, 7) Si naida oni di regbo ka fura riipa gu tagbagapai duho. Mo sa gamo badiarogatise ní ini wai mo abi gupai re na gupai mo aberãha tipaha. Mo “gúmba rengo” fu gamo badiarogatise. (AEfeso 4:25) Zavura ho ngbaduro aima ni ni kerehe, mo banda tiro mo andu ka su na paya watadu kpata. Zezeredi karagapai rengbe ka sa fugo ka si danga ni paya watadu vura ya.​—Asanza 15:4; 26:20.

Ka mo vura soga gupai gamo badiarogatise nagumbaha, mo nifura kindi ni wene fugo. Ka bangiro gonga ti yugo nyemuse na irisa ya. (AKorosaio 4:6) Oni asadi ka mbakada gu tagbagapai kuru ni ipo, na ka oni mbunga fura dagbaroni ya.​—AEfeso 4:26.

GUPAI RENGBE MO KA MANGAHA:

• Mo kpara wene regbo tipa ka fura riipa gu tagbagapai duho

• Ho gamo badiarogatise afura ni, ka mo dewenga fugo ngbani ya. Mo sungudi gamo regbo ka fura

GUPAI ZIAZIA KEKEAPAI AGUMBAHA: “Oni ngbá angba yee na akuaroni; tipa irisa, oni mói kina akuaroni mbata yo.” (ARomo 12:10) Gu gene mo adegaturo ngbaha nga nyanyakipa pai. Mo asadi ka giarogo gupai yo gamo badiarogatise agumbaha ‘ni nunga na umbasitise.’ (1 Petero 3:8; Yakoba 1:19) Ka mo mangingo tiro amanga gbua nga mo nadegaturo ya. Ho du gene ni, mo mbu gupai ambu mo naamangaha ka degaturo, watadu mo sanahe singia oni rengbe ka fura rii gupai re kusa. Ka mo abi gamo badiarogatise ni bakureamo angianga ni vuraro ya, mo ‘nigbanga sa zinga’ te.​—Batungusipai 7:9.

GUPAI RENGBE MO KA MANGAHA:

• Mo nidegeturo kindi, ka si vura du nga gupai mo agiaha angbanga tiro te

• Mo asadi ka rugatiro na gupai gamo badiarogatise agumbaha. Mo kparia pa wai ní amanga na akpotoni gbiati woro fugoni

GUPAI ZIAZIA KEKEAPAI AGUMBAHA: “Rogo sunge dunduko u du rogo ho, ono kungba fugo gbua nandu sa zingohe.” (Asanza 14:23) Anga dakuti gupai rengbe ka mbakadapai nga gu yangarapai si aidaha te. Si naida oni mangi gupai oni ada kuti ni wa du oni ue. Gipai re rengbe ka ida bakere sunge na asadatise, ono sangbanaha ni wenehe. (Asanza 10:4) Ka oni amangapai sa ni kodikodi roni, oni gbia “wene mosoro” gaoni sunge agbia.​—Batungusipai 4:9.

GUPAI RENGBE MO KA MANGAHA:

• Mo diberã tipa agu apai mo nika mangaha ka mbakada gu kpakarapai duho

• Mo niwisigipa wai mo asona ku mbatayo rogo manga gipai re