“Ani arogo tirani na Sophia * tipa agarã naima susa 39 daho ri akpi ni be gbanga kaza. Mi agbia bakere undo be abakure, na mi afu tire kaa manga kura apai. Ono tipa garã sa naabaha, mi adu rogo bakere imisiri gbe. Nunga anaazio re ti ai regbo, na mi anaabi tire nga ka mi za nga tire te. Zavura awere, si ima dia agarã nambeda kina kuti biata wa ri akpi, bakere imisiri nunga nazio re dedede, zanga mi ini aino.”​—Kostas.

Ya mo mo zanganga ga boro rogo kpio yo? Ka si dunga wo duhe, kina gu bangisapai du tipa Kostas re rengbe ka du tipa ro. Kina bete apai gbua rengbe ka ye na fuda berãseyo susi gu nga kpio ga boro badiarogatise, gumeni, watadu wene bakureani. Abangbasia abainipai nga aguyo wisigipai tipa gu rungo naye mbiko imisiri ima ida kuti gupai re. Gu kekeapai i akusihe rogo The American Journal of Psychiatry nape gupai nga “kpio nga gu he naye na nyenye imisiri nga gu nasa boro ni du na gu bipai nga ni ima zanga ga ni boro rogo nyeanye kindi.” Ho boro agbia tini ni na gu kere imisiri du wa gu nga ga pakpio boro adunga ba hi he ti ni ya, gu boro nandu rogo gu kere imisiri re ima rengba ka baka bangiri ni nga: ‘Bagizo regbo wai gi imisiri re nika diaha? Ya mo mi aduadu rengo berewe na ngbarago? Waigu rengbe mi ka gbia undo?’

Akaragapai kuti agi asanahe re du rogo gu sakaapai du rogo gi Awake! re. Gu kekeapai ngbefuo gere, nika sakapai tipa gupai rengbe mo ka mangaha ka si du nga gu boro mo nakpinyemu ni gbe kpi barambeda. Gu kekeapai nika ngbefuo gure nika sakapai tipa agu agene rengbe ka undo ro mo zogosi bete gu kere imisiri du mo rogoyo.

Ani na gu kido nirengo nga, agu apai ngbefuo ho nika du ni pa wasa gbiati undo rogo mangimangipai yo fu ai gu boro nandu rogo gu rungo naye mbiko imisiri.