MO DENGA KPIA GIPAI RE: Mo ndu ku rogo bambu banda kuru ahe tipa yugoho du na dungu kuru mekemeke ahe rogoho. Dungu apaparaha naima gberã akpoto ho ki ima kubo na kura apaparaha ki ima kpataka kusayo. Agu akuraha adunga apaparaha ti ni berewe ya. Ono kuraha sa ni wenehe; si ziazia na gu wiri rukutu apai dunduko du tipa ha. Mo kini sana gu boro na nungusa ro nga, “gere ni vovoho ti akuraha?” Ko kini karagapai foro nga, “oó, si du ni kuruhe kisusi, na i aambakadanga ha te.” Mo kini sanahe nga, “ya mo i aima bandaha be dungu apai?” Gu boro na nungusa ro kini karagapai nga, “oó, dungu apai ima mangaha kodihe na wege gbiati mai. Na dungu aboro ima asada ka gbarasapaha.” Kura regbo, kina ngbaro rengbe ka zere nga: ‘Ginihe du i ambakadihe rogoho?’

Rogo kura gene, Ziazia Kekeapai wakina gi meme he ani nafura tipaha re. Si nga kuru buku—kisusi akuraha. Kura kuru abuku kinaho a. Wakina gu kuru mekemeke ahe naima gberã fuo dungu agarã, dungu kuru abuku naima gberã. Ni kpiapai, agu apai aboro birĩ-inohe agumbaha aima ariatihe mbiko gu vovo inohe du aboro na ni awere. Agu arugute i afuhe tipa banda kpotose ti kura aregbo ni kerehe kuba gupai nga si fu undo. Na dungu kuru kekeapai du kina bete apaparaha areme; agu akura apaparaha aima inga watadu si aima gberã.

Ono tipa Ziazia Kekeapai, si tigaha kia. I atona kekehe 35 kama agarã kusayo, ono tie, Ziazia Kekeapai kindi ni wenehe. Na wa vura duhe nga dungu apai aima mangaha rogo gu kama agarã re dunduko—zokodaha, sogaha, na fura tipaha gbegberẽ—agu  apai Ziazia Kekeapai agumbaha aˈarianga tihe te. Vovo inohe aaringa ha te, na Ziazia Kekeapai nagumba agu apai du kumbatayo.—Mo bi gu sanduki nga: “Regboho Aima Susa Watadu si Kindi?”

Mo rengbe ka bakabangiro nga, ‘Ya mo agu apai Ziazia Kekeapai ayugoho rengbe ka undo rani areme?’ Tipa ka gbia karagapai, mo sananga tiro nga: ‘Gini kpakaraapai aboro agbia tiyo areme na ni? Agi ni gu nafuda aboro areme gbe?’ Mo rengbe ka berã pa avura, birikosi arago, gbegberẽ mangaapai, watadu biriki. Ani wisigingo agu apai awere Ziazia Kekeapai ayugoho. Wa mo nika wisigoho, mo sananga ti ro nga, ‘Ka si ni du nga aboro naraka kuti agi arugute re, ya mo ka zegino du ni wenehe?’

NYEMU ZEREDA

“Aboro maku nga aboro azarõ, bambiko i ayá ti yo awiri Mbori.” (Matayo 5:9) “Oni dú zezeredi na aboro dũ, kina ro tigamo ka si du wa ka mo mangi he.”—ARomo 12:18.

HIPAI NA MBUPAI

“Aboro maku nga airahipai, bambiko i ahi pai fu yo.” (Matayo 5:7) “Nihi pai fu akuaroni, nivu akuaroni, ka pai du bangiri gu boro kuti kura ni; wa Gbia [Yekova] * avu roni, kina wo oni ka manga.”—AKorosaio 3:13.

KODATISE NGA GA ANGBATUNGA

Mbori “ki mangi arika aboro dunduko wa sa i ima auru kpotosende dunduko.” (Amokedi 17:26) “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”—Amokedi 10:34, 35.

BANDA KPOTOSENDE

“Yekova Mbori ki di gu kumba re ki moi ko ku ati Edene yo ko nisópo ho ki nibanda ha.” (Bambata Pai 2:15) Mbori nika “gbarasa agu yo nagbarasa kpotosende.”—Yugoti 11:18.

SOGA DIA NGBITI AHE NA BARI

“Ka oni dí nga ngbiti ahe ya; bambiko i aringbisa nga unga boro na gani ahe te.” (Ruka 12:15) “Ono bari, na pa meteka dũ, na kpihe, ka oni yámbu nga rimoho dagba roni wa sa ya, ni sino ga Mbori aboro.”—AEfeso 5:3.

DU NI RURUSE NA NYANYAKI SUNGE

“Nikpi nyemu ka sunga na rurupai rogo apai dunduko.” (AEbere 13:18) “Gu ni nanidĩ he ka ni dĩ nga he berewe ya. Ni nimángi sunge amanga.”—AEfeso 4:28.

NYAKAPA UNDO AGU ABORO DU ROGO ZINGO

“Oni nyákasi agu yo nawo, oni sóngodi agu yo narungbura, oni hi pai ni gbanga ha fu aboro dunduko.” (1 ATesaroniko 5:14) “Ndu ka bi awirinyaure na adekurugbo rogo gayo rungo.”—Yakoba 1:27.

Ziazia Kekeapai ayugongo agi apai re gbua te. Si naundo rani a wai rengbe ani ka mangaha rogo gaani raka yo. Ka aboro naamangapai kuti agi ayugopai ani natangaraha re, ya mo ka gipai re mbakadingo gu kpakaraapai nafuda aboro areme te? Ni rengo, agu arugute nga ga Ziazia Kekeapai na nyanyakipaha ti gi gaani regbo re susi gu naadu mbata! Ono ginipai agu apai Ziazia Kekeapai ayugoho narengbe ka mangaha foro awere?

Tatamanatatamana kumba aya: “Ono i asapa ngbanga fu tatamana mbiko sabehe.” (Matayo 11:19) Ya mo mo aidanga kuti gipai re te? Gu ndikidipai du tipa tatamana nga wai si amangasunge ho mo amangapai ni na ni. Mo ima rengba ka sana tiro nga: ‘Ka si ngia Ziazia Kekeapai naundo aundo, ya mo ka si kusi nga sangbanaha rogo gimi raka yo te? Wai gu rengbe he ka undo re rogo gu kpakarapai namanga re awere?’ Mo bingo gi kpiapai re.

Tipa Delphine, * gari raka adu ni wenehe rogo apai yo dunduko. Ono wakina ikpiro gumba, agberãngo ati ku rii ri ti mburu kuraha. Tooni wiriri garã ri adu 18 akpi. Gari rogatise agberẽ. Ri ki ti ku rogo zingo marã. Rii agumba gupai nga: “Apai aima nyasa tire—wire te, kumbami te, kporo a te. Mi abi tire nga sunge tire te—rimo tire te, ome te, ka maabangirise adunga tipa kumbatayo a ya.”

Delphine aye ka rugatiri ziazia na gu rengo nga: “Rago tipa gaani agarã wa agarã 70; ono ka ngia mbiko ngarã si ki du wa 80; ono gaha nyaka nga kina mbusa na irairapai; bambiko si nasusa ni ipo, ani ki ga ku sa yo.”—Atambuahe 90:10.

Delphine agbia undo rogo Ziazia Kekeapai ti regbo gari kpakaraapai. Gupai si amangihe fu ri aima du ni wenehe kisusi. A wa gi kekeapai naye biata re  ayugoho, dungu aboro ima bi gupai nga Ziazia Kekeapai ima undo yo ni bakere ho i amangapai ni kuti gaha arugute tipa ka mangapai kuti gayo akpakarapai. I ima ye ki bi gupai nga, Ziazia Kekeapai wakina gu meme he ani nifura tipaha ti tonatona gi kekeapai re. Si wa gu dungu abuku nata ima kini gbere te. Ya mo gipai re nayugo gupai nga i amangi Ziazia Kekeapai rogo gu kura ngbatunga he kia? Ya mo si rengbe ka du nga ga Mbori aberã du rogoho—angianga ga aboro ya?—1 ATesaroniko 2:13.

Si rengbe ka du nga, mo ima bihe ni tiro nga raka ni wiri guruhe ki hi be dungu kpakaraapai. Ho gamo kpakaraapai naida ka dia ni bero, wari gu mo naangera ku ho ni tipa wasa, undo, na ndikidi arugute?

Ani wisigingo agene biata rengbe Ziazia Kekeapai ka undo ro ngbaha rogo gamo raka yo. Si rengbe ka yugopai foro tipa wai rengbe mo ka

1. ne kpakaraapai.

2. mbakada kpakaraapai ho si akura ni.

3. Hipai rogo agu apai mo arengbanga ka ariaha ya.

Agu kekeapai nika ye fuo gere nika sakapai tipa agi apai re.