Rogo gu kekeapai nisusi, ani makiapai tipa gu pai Yesu agumbaha nga si nika yugopa sigira Kindo. Gi pai re nayugo gu gopai du gbaiga nga i aima sigira ga Mbori Kindo ngbangbaturũ yo na Yesu Kristo ki ngia bakindo.

Ziazia Kekeapai nagumba gupai nga ho Yesu atona zogarago ni ko ado Satana na gako adaimona kusayo ngbangbaturũ yo. Awere, i na ome kina kurii agu apai namanga auru kpotosende, si nga ndupai sa dagba gu nduapai sa apai si da ni gbegberẽhe naatona rogo gu garã nangia 1914.—Yugoti 12:7, 9.

Wa apai avura kaa gberã kina kumbatayo rogo zegino, Yesu nga Bakindo nga ga ga Mbori Kindo ima manga apai ka undo aboro rogo zegino dunduko. Mbiko gu sunge yugopai nga ga Ziazia Kekeapai nga gu Yesu afura tipaha kumbatayo, badungu aboro nawirikapai na kini mangipai kuti agu abangua arengo nga ga Baibiri rogo gayo raka yo na aˈuru dunduko. (Yesaya 2:2-4) Amirioni aboro ima wirika wai ka sa gayo ramukporo si du na ngbarago na wai ka zanga mbu sunge marã watadu aũzegino si du ni banyanyakipa pai rogo gayo raka yo. Agi aboro re nagbia undo awere ti gupai i awirikaha na i nada ni ngbatunga agu aboro Mbori aida i du ni agu azogo nga ga gako Kindo.

Wa vura duhe nga Yesu nazogarago azoga awere ngbangbaturũ yo, agu azogarago nga ga wiri aboro nazogarago kindi auru kpotosende ane. Ono tie, Mbori ima fu rugapai fu Yesu nga: “Mo zógo rago dagba avuraro.” (Atambuahe 110:2) Barambeda, Yesu nika gbarasa avurako dunduko na ki ye na zereda fu agu aboro nakpinyemu ka ranigoyo fu ga Mbori Kindo.

Barambeda, ga Mbori kindo nika mangapai tipa ka:

• Dia ziree pambori kusayo. Gu ziree apambori nayugo ziree tipa Mbori fu aboro na niima sa raka ni kpakarakpakaraha fu aboro adunga berewe te. Ziazia Kekeapai nafura tipa ziree pambori nga si nga debäri. Pa gbarasaha nika zigbä kura aboro azigbä.—Yugoti 17:15, 16.

• Digiso gu zogarago nga ga wiri aboro. Ga Mbori Kindo nika mangaapai na si “akúadi agi angbi re rukutu ki digisi he dunduko, si ki nye anye kindi.” Gure nika ngia digido gu zogarago nga ga wiri aboro.—Daniere 2:44.

• Dia gbegberẽ aboro kusayo. Ginipai tigaha du tipa agu aboro kakuti manga gbegberẽ pai na ki ká ka gia sangba Mbori? “I aróga gbegberẽ aboro ku sa yo zegino.”—Asanza 2:22.

• Dia Satana na adaimona kusayo. Satana na adaimona adunga na ome ka ‘nanga arikaaboro berewe te.’—Yugoti 20:3, 10.

Ginipai agi apai re nika yugoho fu agu aboro naida na ga Mbori Kindo?

Yesu nazogarago ngbangbaturũ yo ni Bakindo, ko nika manga agu apai gu bazogo nga wiri boro arengbanga ka mangaha ya. Agu aboro nika undo ko ti zogarago du bangeyo nga 144,000 nga agu yo i asia yo rogo ngbatunga aboro dunduko. (Yugoti 5:9, 10; 14:1, 3) Ko nika mangapai tipa gupai Mbori akpinyemuhe mangi auru kpotosende ane. Ginipai ga Mbori Kindo nika mangaha fu agu aboro nika raka auru kpotosende ane?

• Si nika dia kaza na kpio kusayo. “A nga boro kporo sa ayá, ‘Mi nawoka’ te” na “kpio adú nga berewe te.”—Yesaya 33:24; Yugoti 21:4.

• Si nika ye na zereda na ngbabase. “Awiro dunduko kina re nikayugo pai fu yo, ga awiro wenepía adú ni bakere he,” na “aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te.”—Yesaya 54:13; Mika 4:4.

• Si nika fu wene sunge fu aboro. “Gimi siasia aboro ará zezeredi tipa gbanga rago mbiko gu mangapai nga ga beyo. I amánga nga sunge gbua te.”—Yesaya 65:22, 23.

• Si nika nyasa riipa gu kpakarapai nga ga sende. “Ngbakungba na gu rago ugu auga adu na ngbarago, ngbi ngume angi ki mbumba na mbumbuda ahe; si ambumba kpaima.”—Yesaya 35:1.

• Si nika yugo gupai fu aboro si aida i mangihe tipa ka raka nyeanye kindi. “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Mbori naida aida mo gbia ngbarago ti agu amaku re. (Yesaya 48:18) Gu kekeapai naye fuo gere nika sakapai tipa gupai rengbe mo ka mangaha awere tipa ka du ni papara gu wene raka du kumbatayo re.