Agu aboro naraka rogo gu rago re nga aboro gamahe na wenesino. Si ni pa gberãrago ka bi gupai nga, amangi gbegberẽ apai asa gi rago re ni kere ba gbe.

I avungure ni ue gude dagba akumbagude. Avungure andu na mi i bapatizi re rogo gu Kanisa nga ga Katoriko, kusa mi ada ni bayango kanisa yo. Mi adu na nyemu ka sa ngbarago ti Mbori mbiko mi aagunde be sapangbanga na pa gbi nyeanye kindi rogo we.

Ho garã re adu ni bisue, buba ambu rani na kporo. Gipai re aima ye na bakere rungo fere na kpotoreyo kidu na bakere gberãrago. Ani aima kpinyemu ko, ono ani ainongo gupai ko ambu rani ti ni te. Si aaida nina nimangisunge tipa gbanga asaa tipa ka ngerefuo rani dunduko wa ani du biama nga akumbagude.

Gi pai re asa re mi kuru sukuru yo ki tona koda tire na kura sosono agude. I ayugu gbegberẽ afugo fere, vugundö, dĩ, na ki sare mi ni ta kpata na bunia. Wa duhe nga mi aaida kadu na ome ki susi aboro dũ, mi awiriki angbatunga akpata dunduko, kodihe na wirika wai ka mangasunge na ũvura. Mi ada ni kere zingizingi paranga. Wo ani anaazumuda tirani na bundu, na ti kura aregbo, mi ani nye bangiri gene akpoto re kidu dunduko nga kina kure be aro. Mi anaaba kere rungo na mbugo ti nina ho ri ani ye ka bire ni wa gere si ki ni idi ri di re ka ora na mi ku bambungua yo!

Ho garã re ada ni nga 16, kura bakureami ani aasona nako rimoko angia Jorge aye ka birani kpurani yo. Ko aya furani wẽ, ko nga boro sa dagba aDezire Yekova yo, na ko naida ka pe kura nyanyakipa pai furani. Ko amangisunge na Ziazia Kekeapai tipa ka sakapai tipa gako aida. Mi aageda nga pai mbata wa gere te, mi adu na ngbarago tipa ka ino rimo Mbori na gako ringbisapai. Jorge asana re tipa ka wirika Ziazia Kekeapai na mi. Mi kini idihe.

Fuo wirika mi gipai re, mi aadunga berewe na kere gunde be Mbori te. Kuba gure, mi atona ka biko wa gu Bagude naida na weneapai tipa awirini.

 Wa mi aandu kumbatayo na gi wisigo Ziazia Kekeapai, mi abi gupai nga si naida mi mangi aˈariapai rogo asino re yo. Si aaida mi sonosi gu sino nga umbasitise ki mbu gbegberẽ mangaapai. Gu rugute du rogo 1 AKorindo 15:33 naundo re, si naya, “gbegberẽ kpamiatise nagbarasa wene sino.” Mi aye ka bi gupai nga, ka mi aida ka sa asino re, si naida mi mbu koda tire na agu aboro gayo gbegberẽ asino narengbe ka du na ome kurii re. Mi azi vovo abakure na gu ndikidi aKristano du rogo gu dungurati nga ga aKristano, nga agu aboro namangasunge na agu arugute du rogo Ziazia Kekeapai tipa ka mbakada gayo kpakaraapai angianga kina ngba ome ya.

Gu kura papara Ziazia Kekeapai na fõngbadu re yo berewe nga ARomo 12:17-19. Si naya: “Ka oni karaga nga gbegberẽpai fu boro ku ba gbegberẽpai wa sa ya. . . . Oni dú zezeredi na aboro dũ, kina ro tigamo ka si du wa ka mo mangi he. ka oni mangi nga boro ti pai fu roni ya, . . . bambiko si ni keke he ya, “Pa ira bape nga gimi, mi akaraga pai, Gbia nipoi wo” Mi aye ka ino gupai nga Yekova nika mangapai amanga kuti agu agbegberẽ apai namanga re ti kina gako regbo. Tooni tooni, mi atona ka mbu gu gbegberẽ raka mi aarakaha.

Bangire agonga ti gupai namangi rogo kura nyemu sa ho mi aaga ni ku kporo yo te. Mi agbia tire na agu amangi gbegberẽ apai ani anaasovura kuti yo, bairayo ki ye ki nari re giire yo ki ta ngbako kurii re ki ya, “Mo batasinga tiro!” Ti gu regbo re, mi amangi guru kparakpee fu Yekova tipa ko undo re mi hi gupai re. Wa mi avura du na zinga ku rogore yo ki idi ka irabape, mi aima guari rogo zereda yo. Fuo girorago, mi agbia bairayo ni sako. Kere zinga aguari rogore yo berewe, ono mi asana Yekova berewe tipa ko undo re mi du na zatise. Kina ngbare nazere ka bi gupai nga, gu paranga re aye koyo du mi ni nibasa ki ya: “Mo mbupai fere tipa gupai namangi gba re. Gupai duho nga, mi naida ka du wakina ro. Mi naida ka wisigo Ziazia Kekeapai.” Rago aima ngba tire nga, mi aima asada ka banda tire ti zinga rogo agu apai re dunduko! Na mi na ngbarago nga, ko atona wisigo Ziazia Kekeapai a.

Wa gimi aborokporo avura mbu wisigo Ziazia Kekeapai ti gu regbo re, mi amangi nyanyaki diaberã tipa ka ndu kumbatayo kindi na gi wisigo Ziazia Kekeapai zanga mbu boro ni ka na mi ti ni. Mi aima ino gupai nga, pa koda mi tire dedede na ga Mbori aboro nika husa agu imisiri du kpotore yo na ki fu agu aborokporo fere mi aida yo. Mi aamanga sonakumbatayo kindi, na rogo 1991, mi azi bapatiza na ki da ni boro sa dagba aDezire Yekova.

Ono Fugo Mbori ima aria gimi raka naabaha. Awere, mi natungusa gu pangbanga zereda nga ga Ziazia Kekeapai fu agu aboro dunduko naida ka giaha. Mi aima gbia gu momu nga ka mangasunge tungusapai ti aregbo dunduko vuru agu agarã 23 susi kusayo.

Tipa bete regbo, mi aafu tire ka mangasunge rogo gu be-basunge nga ga aDezire Yekova du Mexico yo. Ho mi adu ni yo, mi agbia bawene paranga Kristano nga Claudia, ani arogotirani rogo 1999. Mi nafu tambuahe fu Yekova tipa fu gi wene moundo re fere!

Ani amangisunge wa sa rogo gu dungurati du Mexico yo nga gu i afura rogoho ni bee, ani aundo airangbiängä tipa i wirikipai tipa Yekova. Kusa, i ayambu rani ku Belize yo tipa ani yugu Ziazia Kekeapai fu aboro rogo gu ringara re. Wa vura duhe nga ahe berani herẽ gbe te, agu ahe du ani na zingoho kina berani. Raka ho ngba tirani susi gere te.

Tifuo bete regbo, nina atona gari wisigo Ziazia Kekeapai berewe na ri ki zi bapatiza. Unvurami na diako gbiati awiriyo awere nga kina aDezire Yekova. Bete agu abakureami mi atungusipai fuyo nga kina aDezire Yekova awere.

Si nafu kina gberãrago nga, kura aboro dagba gimi aborokporo yo aima kpiko mbiko gupai nga i aˈarianga gayo gbegberẽ sino nga ga zinga te. Wa ka mi aamangapai kindi ngba gayo agene, mi nabihe nga kina gu bangisapai re ka du tipa re awere. Mi nafu tambuahe nga Yekova aye na mi koyo du ko ni na koyo du airisiko ni, nga agu aboro nayugupai fere ni zerangbaduse na rogo wenesino tipa mi mangisunge na agu arugute nga ga Ziazia Kekeapai rogo gimi raka.