Nyemuse nga guhe nasa boro ní duna bakere nunga koyo du kura aboro ni. Boro nyemuse nayugoho rogo gani afugoyo na rogo gani mangaapai wai ní abi agu aboro ní akpinyemuyo, zavura ho pamangaha ni wo aida ní mbupa kura gani apai ambu vurũ.

Moize ayugu nyemuse tipa Mbori. Rogo gini gene? Agu afugo du nikekehe rogo 1 Yoane 5:3 nayaa: “Bambiko gi nga du na nyemu Mbori re, nga ka ani kuti gako rugute.” Moize amangipai ringbisihe kuti kina gi bangua rugute re. Agu apai dunduko Mbori aya fuko ko mangihe, ko aima mangaha dunduko, tona tigu nyanyaki sunge nangia ka ndu fuo gu boro ome nangia Faro, ki dati gu taataha nangia ka nara Zamba Baime na gako ngbondo. Singia gupai i aya fuko ko mangihe aduni aakpuraha watadu ninyanyakihe, ko aima giasangba. Ko ‘amangihe kinawo.’—Gate 40:16.

Moize ayugu nyemuse fu akurako aYisaraere. I aima ino gupai nga Yekova du naamangasunge naako ko ngbembatayo fu gako aboro, si du i anaaye ti ni na gayo akpakarapai fuoko. Ziazia Kekeapai nayaa: “Aboro ki ru aru pati Mose tona wiso ki da ku nyemu.” (Gate 18:13-16) Ani berẽnga kina wai ome Moize avura bata be degatuko ka gia ga aYisaraere akpakarapai tona wiso ki da ku nyemu! Ono tie, ko aduna ngbarago ka undo agi aboro ko akpinyemuyo re.

Kupati gia Moize gayo apai, ko akpari a tipa yó. Ko akpari a tipa agu aboro naingipai kutiko! Nikpiapai, ho dawiriko nangia Miriama agumba rimoko ni tipa gu sunge Yekova afuhe fuko, Yekova aukadi ri na ngbataka. Kuba gupai nga ko ngi tipa gu mbusa Yekova afuhe furi re, ko akpari nibasa tipa ri ki yaa: “Ako Mbori, mi nazungadi ro, mo husi ri.” (Pa Geda Aboro 12:13) Nyemuse naasa Moize ko kpari tipa ri.

Ani rengbe ka wirika ga Moize kpiapai nisonosa ani dudunguro nyemuse tipa Mbori. Ngbatunga gu nyemuse re nasarani ani irisi gako andiko na “kpotoroni yo” dunduko. (ARomo 6:17) Ho ani agiasangba Yekova ni na kpotoraniyo dunduko, ani nasa ngbarago tiko. (Asanza 27:11) Ani nagbia undo agbia a nitirani. Nirengo, ho ani amangasunge ni fu Mbori mbiko ani nakpinyemuko, anga gure nga ani namanga kina rurupai sa te, ono ani nagbia ngbarago be manga ani he wo!—Atambuahe 100:2.

Gu kura gene si aida ani wiriki Moize ngbaha nga ka mbupa kura gaani apai tipa ka sonosa nyemuse tipa kura aboro. Ho abakurearani watadu gaani aborokporo agumba gayo akpakarapai ni furani, nyemuse nasarani (1) ani degeturani fuyo, (2) ani asadi ka ino agu apai namanga yó, na (3) i ini gupai nga ani naberãpayo aberã.

Wakina Moize, si naida ani kpari tipa agu aboro ani akpinyemuyo. Ti kura aregbo, ho i ape gayo akpakarapai ni furani, ani rengbe ka bi tirani nga ani arengbanga ka undoyo te. Ani rengbe ka ya fuyo wee: “Gu kura pai ho ka mi mangihe tipa ka undo ro te fuo gu nga ka kpara fu Mbori tipa ro te.” Ono ani tingidi gupai nga: “Gu nyanyaki kpe nga ga ruru boro du na bakere tandu.” (Yakoba 5:16) Gaani akpee rengbe arengba ka sa Yekova ko mangipai fu boro nga gu ka ko naamanganga ha ya. Nirengo, gini kura wenepai duho berewe ka ani mangihe fu agu aboro ani akpinyemuyo susi gu nga ka kpara tipa yó? *

Ya mo oni aidanga kuti gupai nga ani rengbe arengba ka wirika badungu apai be Moize te? Wa ko avurangia boro wakina rani, ko amoi wene kpiapai nga ga idapase, umbasitise, gbiati nyemuse. Kaa ani aawirika gako kpiapai gbe, kinawo a ani ka undo tirani na kura aboro a.—ARomo 15:4.