1, 2. Ginipai ga Mbori Kindo nika mangaha, na tipagine rengbe ani kadu nakido ti ni nga si nika yeaye?

YESU ayugupai fu apefuoko rii gu bagangara naadu mbembedi na Kaparanauma rogo gu garã nangia 31 nga i nikpari ki niya: “Ga ngbi yé.” (Mt. 6:10) Areme, dungu aboro natikango singia gu Ngbi re aye ni rengo. Ono tie, ani na gu kido nga Mbori nika karagapai akaragapai kuti gu gaani kpee du tipa gako Kindo ye.

² Yekova nika mangasunge na gako Kindo tipa ka sa amaraika na aboro i du ni kodikodi yo wa aborokporo sa. Gu ga Mbori kidohe re nika digo adigo. (Yes. 55:10, 11) Nirengo, Yekova nga Bakindo ti gi gaani regbo re! Agu apai mangi vuru agu agarã susi 100 re nga go agi apai re. Mbori namanga bawene apai fu amirioni gako amoyambu du ni ruruyo fuko. (Zek. 14:9; Yugo. 15:3) Ono tie, anga padu Yekova ni Bakindo sa na paye gako Ngbi Yesu aya ani kpari tipaha te. Waigu du agi apai re ni bakiakia, na wai duhe na ome kurii rani?

3. (a) Gini regbo Yesu ada ni Bakindo ti ni, na wari? (b) Ginipai nayugoho nga i asigira ga Mbori Kindo rogo 1914? (Oni bi gu kekeapai du bandu waraga yo.)

³ Bara ti digido 19 kama agarã, ga Mbori amoyambu atona ka rugatiyo na pa gu sangbaanebi Daniere akehe agarã 2,500 kusayo nga: “Rago agu abakindo re Mbori ngbangbaturũ  amáa gu ngbi nga gu ka i agbárasa nga ha wa sa ya.” (Dan. 2:44) Abawiriki Ziazia Kekeapai aima digo nipe gupai nga gu garã nika ngia 1914 ni kadu ni iiriwoho. Dungu aboro amaabangiriyo nga apai nika du wenengai. Kura bakeapai sa aya: “Aboro aima du na maabangirise gbiati kido rogo gu garã nangia 1914.” Fuo tona Bambata Vura Nga ga Zegino kusa rogo gu garã re, gu sangbaanebi nga ga Ziazia Kekeapai ada ti rengo. Angbongi, abazigizo, ririakaza gbiati gu kura asangbaanebi nga ga Ziazia Kekeapai nadigisi tihe ayugu gupai nga Yesu aima tona zogarago ngbangbaturũ yo ni Bakindo ga Mbori Kindo rogo 1914. * Ho Yekova amoi Wiriko ni ni Bakindo, Yekova ada ni Bakindo ngba gu kura vovo gene!

4. Gini bambata pai gu vovo Bakindo Mbori amoi ko amangihe, na ada ko agbeberã ko fuoyo?

⁴ Gu bambata pai ga Mbori vovo Bakindo amangihe nga ka sovura kuti gu vura Bako nga Satana. Yesu na gako amaraika ado Satana na gako adaimona ngbangbaturũ yo. Gipai re aye na bakere ngbarago ngbangbaturũ yo ono ki ye na gu gberãngbi naamanganga mbata ya uru kpotosende ane. (Oni gedi Yugoti 12:7-9, 12.) Fuo gure, Bakindo atona ka kpuruwa gu gako aboro naadu auru kpotosende ane, ka yugupai fuyo na ki mbakadi yo i mangi gupai Mbori akpinyemuhe. Ani bingo wai ani awirikapai areme be gayo wene karagapai kuti agi apai biata ga Mbori Kindo amangi yo na ni re.

5. Gini girisohe namangi bangbanda agu agarã nangia 1914 na 1919?

⁵ Fuo Bakindo girisi ngbangbaturũ ti ga Satana gbegberẽ mangaapai na gako adaimona, Yekova aruguko ko wisigi apefuoko rogo toro yo auru kpotosende na ki kpuruwa yo. Gu nebi nangia Maraki afura tipaha ki ya si angia giriso yo rogo toro yo. (Mara. 3:1-3) Apangbanga nayugo gupai nga gipai re amangi bangbanda agu agarã nangia 1914 na tonatona 1919. * Tipa ani du ni kodikodi rani wa ga Yekova aborokporo sa na amaraika, ani du wa ka ani du gigiri watadu ziazia. (1 Pet. 1:15, 16) Ani du wa ka ani bandatirani ti gu biriko nga ga zire pambori watadu agu apai nga ga birĩ-zogarago.

6. Waigu i afu gu riahe nga ga toro, na tipagine duhe ti ni na nyanyaki paha?

⁶ Fuo gure, Yesu amangisunge na gako pagbia ka maa “kangara moyambu.” Si adu nga gu moyambu re nikaa fu gu riahe nga toro dedede fu agu aboro dunduko nga ‘rimbasa akandoro’ du tiibe Yesu. (Mt. 24:45-47; Yo. 10:16) Naatona rogo 1919, gu umba badona nga ga mbembedi aKristano namanga gu nyanyaki sunge nga kaa riga ga Yesu “aboro kporo.” Gu riahe nga ga toro i afuhe re na sarani ani nyaki rogo idapase yo. Si nanyakasa rani ani du gigiri rogo toro yo, mangaapai, berãrani, na ti kpotorani. Gi riahe nga ga toro re nayugopai a furani na kini undo rani ani mangi gu nyanyakipa sunge namanga areme auru kpotosende. Ya mo mo namangasunge na agi agamahe re wenengai?

7. Gini nyanyakipa sunge Yesu atonaha ho ko adu ni auru kpotosende, na si adu nga si nika ndu dati gini regbo?

⁷ Ho Yesu atona gako tungusapai ni auru kpotosende, ko aya: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko  si du i akedi re tipa ha.” (Rk. 4:43) Tipa garã biata na beberehe, tungusapai nangia nyanyakipa pai rogo ga Yesu raka. Ko arugu gako abawiriki ki ya: “Wa oni ka ndu, oni ta tungusa pai, niya, ‘Gu ngbi nga ga ngbangbaturũ si mbedi.’” (Mt. 10:7) Fuo zingako be kpio, ko ape gupai nga apefuoko nika gbandaka gu pangbanga re ku “digida sende yo.” (Amo. 1:8) Ko akidohe nga ko nika undoyo rogo gi nyanyakipa sunge re da ti gi gaani regbo re.—Mt. 28:19, 20.

8. Waigu Bakindo angarasi gako aboro tipa i tungusipai?

⁸ Rogo 1919, gi “wene pangbanga nga ga ngbi re” akusi kura vovo rogoyo. (Mt. 24:14) Bakindo aazogarago ngbangbaturũ yo, na ko aima dungura umba badona nga ga gako amoyambu naadu ni gigiri yo. I akaragapai wenengai kuti gu ga Yesu rugapai nga: Oni tungusipa gu wene pangbanga nga ga Mbori Kindo rogo kpotosende dunduko! (Amo. 10:42) Ni kpiapai, rogo Mbirinvuo 1922, abatungusipa Kindo bangeyo aima mbeda kuti 20,000 adu pati gu bakere dunguratise nga ga dungu aringara namangi Cedar Point, Ohio, Amerika yo. Oni berẽnga pa gu ngbarago i adu na ni ho gu wirina nangia Rutherford amangi gu gumbapai ni riihe angia “Gu Kindo Nga ga Ngbangbaturũ Ima Mbeda” na ki ya: “Oni bi Bakindo wa ko azogarago! Oni nga gako abandusunge. Sidu tie, oni takipande, oni takipande, oni takipande Bakindo na gako zogarago.” Aboro ue kutu dagba agu aboro naadu pati dunguratise andu ka tungusapai rogo akporo tipa amairo nga 45 tuturũ ti gu ba i amanga dunguratise rogoho re. Wirina sa ape gupai nga: “Bangire ago tigu yambahe naadu tipa takapande pa Kindo na wai agu aboro naadu pati dunguratise andu tipa tungusapai te!” Kina gu bangisapai re naadu tipa kura dungu aboro a.

9, 10. (a) Gini mbakadapai i namangihe tipa ka raba abatungusipa Kindo? (b) Waigu mo nagbia undo ti gi rabahe re?

⁹ Rogo 1922, abatungusipa Kindo bangeyo asusi 17,000 aatungusapai rogo aringara nga 58. Ono tie, si aaida i raba yo. Rogo bambata sa kama agarã, Bakindo afu rugapai fu gako abawiriki tipa gupai si aida i tungusihe, gu ba i ka tungusaha rogoho, na wai i ka tungusaha. (Mt. 10:5-7; Rk. 9:1-6; 10:1-11) Kina gu bangisapai re Yesu amangaha areme nga ka fu arugute fu agu aboro dunduko natungusapa Kindo na kini fu aũsunge fuyo tipa i mangihe wenengai. (2 Tim. 3:17) Yesu naraba gako amoyambu tipa tungusapai vurube gu dungurati nga ga aKristano. Gene sa ko araba yo ngbaha nga rogo Gu Sukuru Nga ga Siokrasia namanga rogo adungurati bangehe naima susa 111,000. Gi sukuru re naundo abatungusipai bangeyo  naima susa amirioni saba i du na birĩ tungusapai na kini yugupai ngba gu gene nazio ngbadu ‘aboro yo dunduko.’—Oni gedi 1 AKorindo 9:20-23.

¹⁰ Kurigure, kura asukuru kinaho i nasigiraha tipa ka raba abaakumba rogo dungurati, bazakigene, agu awirina nga abakuparanga, arogotise, agu awirina du rogo gu rondo Nga ga Be-basunge na adiayo, agu ababiapai ninaata ata na amokedi. * Kura awirina naandu tipa Gu Sukuru Du Tipa Raba Arogotise ayugu gayo tambuahe tipa gu sukuru re ki ya: “Gu bawene rabahe ani agbiaha aima kiiso gaani nyemuse tipa Yekova na si ima fu birĩ furani ani undo kura aboro.”

11. Waigu abatungusipa Kindo ahipai i ki vura kaa gbiatiyo na rungosi vurũ?

¹¹ Gu vurarani nga Satana nabi gu bakere tungusapai na yugopai abi namanga. Ko namanga ome ka zubo rani na ka rugusa sunge tungusapai. Ono ko na diabese te. Yekova ima maa Wiriko “ri azogoaboro dũ, na asia pa pai, na tandu, na kindo na agu arimo dũ i ayamba.” (Ef. 1:20-22) Wangia Yesu Bakindo, ko namangasunge na gu pagbia du ko na ni ka banda abawiriki tipa i mangi gupai Bako akpinyemuhe. * I na tungusa wene pangbanga na kini yugupa ga Yekova agene fu amirioni aboro du na wene ngbaduyo yo. Nairiwo gu momu du berani nga ani mangi gi nyanyakipa sunge re!

12. Oni pekenga pa agu apai namangi tipa giriso ga Mbori amoyambu fuo sigira Kindo.

¹² Naatona ti gu regbo i asigira Kindo ti ni rogo 1914, Bakindo agirisi gu gene gako amoyambu amanga gupai Bako akpinyemuhe ngbaha. (Oni gedi Yesaya 60:17.) Rogo 1919, i asia abarugupasunge rogo adungurati ni basasa tipa i ni ngbembatayo rogo sunge tungusapai. Rogo 1927, i amangi mbakadapai kaa tungusapai kporo na kporo Rago aPoso. Rogo 1931, abatungusipa Kindo agbia gu rimo nga aDezire Yekova nga gu nafõ yo i tungusipai gbe. (Yes. 43:10-12) Mbata kusayo, i anaaba waraga aba tipa ka sia agu aboro naangbembatayo rogo apai rogo dungurati, ono rogo 1938 i atona ka siayo ringbisihe kuti gupai du rogo Ziazia Kekeapai. Rogo 1972, gu gbuu nga ga abaakumba atona ka ngerafuo dungurati angianga bangisa boro berewe ya. I angarasi agu akumba dunduko naadu na inohe i ‘mbú ti ga Mbori rimbasa akandoro du dagbayo.’ (1 Pet. 5:2) Rogo 1976, i akparaka Riigbu Bipasunge ku rogo abadona sita tipa i ngerekurii  sunge tungusapai rogo zegino dunduko. Naatona ti gu regbo re ka da ku areme, Yesu nambakada apefuoko kindi tipa i mangiapai ngba gu gene Mbori akpinyemuhe.

13. Agu apai Masiya namangihe vuru agarã 100 na gini ome kuriro?

¹³ Mo berẽnga pa agu apai Bakindo namangihe vuru agu agarã 100 nga gako zogarago! Ko ima giriso aboro tipa rimo Yekova. Ko nanungusa sunge tungusapa wene pangbanga nga ga Kindo rogo aringara nga 239 na kini yugupa ga Yekova agene fu amirioni aboro. Ko ima sa gako azogo du ni ruruyo fuko nga amirioni saba fu tiyo zaza ka manga gupai Bako akpinyemuhe i du ni kodikodi yo. (Tam. 110:3) Nirengo, ga Yekova mangaapai vurube Masiya ni bakerehe na ni iriwoho. Ono kura wene apai kindi ku mbatayo!

14. (a) Ginipai ani asana Mbori ko mangihe ho ani akpara ni nga: “Ga ngbi yé”? (b) Gaani veresi nga ga gu garã nga 2014 nga gine, na tipagine rẽhe arẽ ti ni?

¹⁴ Wa vura duhe nga Yekova aima sia Wiriko nga Yesu Kristo ko du ni Bakindo rogo 1914, anga gure nangia karagapai nzunzu kuti gu gaani kpee nga “ga ngbi yé” te. (Mt. 6:10) I aima gumbaha rogo Ziazia Kekeapai nga Yesu nika ‘zogorago dagba avurako!’ (Tam. 110:2) Ga aboro zogarago nasogote ga Mbori Kindo kindi. Ho ani akpara ni tipa ga Mbori Kindo ye, gure nga ani nasana Mbori nga Masiya na abadiangbako ye ka digiso gu zogarago nga ga aboro na ki di agu aboro na sogote ga Mbori Kindo kusayo. Gi mangaapai re nika digiso agu afugo du rogo Daniere 2:44 nga ga Mbori Kindo “akúadi agi angbi re rukutu ki digisi he dunduko.” Si nika nyasa riipa agu azogarago nasoga ga Mbori Kindo. (Yugo. 6:1, 2; 13:1-18; 19:11-21) Gipai re ima mbeda ka manga. Gu gaani veresi nga ga gu garã nga 2014 si nga Matayo 6:10. Si rẽarẽ mbiko si naya: “Ga ngbi yé”! Agarã ima susa awere nga 100 wa Yesu atona zogarago.

15, 16. (a) Gini wene apai nika manga ti regbo Zogarago Tipa Agarã Kutu? (b) Ginipai Yesu nika mangaha ni yangaraha, na ginipai si nika yugu ho nibipa ga Yekova ringbisapai tipa gako kusikusihe dunduko?

¹⁵ Fuo Masiya gbarasi avura Mbori, ko nika ba Satana na gako adaimona ku rogo gu due zanga mburuhe tipa agarã kutu. (Yugo. 20:1-3) Wa duhe nga bakitingbanga adu nga na ome berewe te, ga Mbori Kindo nika undo aboro niipo i gbia undo ti ga Yesu motumo, na ki di gu ingapai Adamu aye na ni kusayo. Bakindo nika zingisa agu amirioni aboro du murö yo na ki mangi mbakadapai ka yugopai fuyo tipa Yekova. (Yugo. 20:12, 13) Kpotosende naabaha nika du wa gu paradizo naadu ati Edene yo. Ruru aboro dunduko nika du ni rengberengbe yo.

¹⁶ Ti digido ga Kristo Zogarago Tipa Agarã Kutu, gako zogarago nika nyasa manga gupai si aidi si mangihe. Fuo gure, Yesu nika karaga Kindo fu Bako. (Oni gedi 1 AKorindo 15:24-28.) Ndupai adunga ho berewe tipa Yesu du bangbanda rani na Yekova te. Agu awiri Mbori dunduko du ngbangbaturũ na aguyo du auru kpotosende nika du ni kodikodi na Bayo wa aborokporo sa.

17. Ginipai mo nadiberã ka mangaha nibipa Kindo?

¹⁷ Gu wene apai gu zogarago nga ga Kindo namangihe vuru agarã 100 nakido rani nga Yekova na pagbia beko na gako ringbisapai tipa kpotosende nika digo adigo. Ani nyenga anye ni ruru rani fuko na kini takipande pa Bakindo na gako Kindo kindi. Ani na kido nga Yekova nika karagapai akaraga barambeda kuti gu gaani kpee nga: “Ga ngbi yé”!