AGU APAI NANDU NA GUPAI DU TI KPOTOHO | YA MO BORO HO RENGBE KA INO GUPAI DU KU MBATAYO?
Agu Apai Naamangi na gu Dunguhe Naamanga Ya
Ya mo mo naida ka ino gupai du tipa gamo raka ku mbatayo? Dungu aboro naida aida ka inopai tipaha. Dungu aboro ninaafura tipa agu apai nika manga ku mbatayo ono surungbaha ki du ni bakiakia. Ani bingo agu apai du re:
-
ABORO-BIRĨ-INOHE, i namangasunge na kere aũsunge gbiati bakere marã tipa ka pepa ngbatunga agu ahe rengbe ka gberesapa kpotosende ku mbatayo na ka inopai tipa gu mai nika na.
-
WENE ABAWISIGIPAI, i naafura tipa agu apai nika manga ku mbatayo rogo ba-bagaahe na poritiki. Warren Buffett nga wene kumukokumuko boro rogo zegino naafura dedede tipa wai ko ka du na diabese ku mbatayo rogo gako sunge bagaahe. Nate Silver nga gu kura bawisigipai naafura tipa agu apai nika undo ko ko pepa agu apai dunduko nika manga ku mbatayo rogo ga Amerika birĩ zogarago watadu agu avidio i akusaha.
-
KURU APANGBANGA, aboro naafura tipaha ya si nga sangbaanebi. Bete aboro nabi sangba gu kekeapai nga ga Michel de Notredame (Nostradamus) si nidigisitihe areme. Gu ga aMayan karendaria nadigi rogo Banduru 21, 2012, kura aboro afura tipaha ya si nayugopa gu kerepai nika manga ku mbatayo.
-
AGBIA PAMBORI, kura aregbo kinaho i afu zahe fu aboro tipa gu kereapai naye ka manga na ka gbeberã aboro fuoyo. Gu nebi nga Harold Camping atakipande pa uru sapangbanga na apefuoko kini tungusihe fu aboro nga i nika gbarasa zegino rogo 2011. Ono tie, ani naraka kindi rogo zegino.
-
APE SANGBAATORO, nata ngbaduyo nga i du du na tandu beyo tipa ka ino gupai du ku mbatayo. Edgar Cayce na Jeane Dixon afura tipa pai ku mbatayo tipa 20 kama agarã na si ki ima manga. Ono wa du yo ni basasa, dungu apai kinaho i apehe ka si amanganga ya. Ni kpiapai, Dixon afura tipa pai ku mbatayo nga Biata Vura Nga ga Zegino nika manga rogo gu garã nangia 1958, na Cayce ki pe gupai nga gu gbata nga New York Amerika yo si nika rindo naabaha ku ime yo vuru agu agarã natona rogo 1970 ku mbatayo.
Ya mo ba ho rengbe ani ka inopai tipa apai ku mbatayo rogoho? Gere nga gu nyanyakipa sanahe si aida ani sanaha. Ka mo rengbe ka wisigipai tipa agu apai naye ku mbatayo, raka nika du kia foro.
