1, 2. (a) Ginipai nayugo gupai nga gu dungurati naadu Korosai yo adu nizubo zuboho? (b) Gini rugute Pauro afuhe fu agu awirina naadu Korosai yo i ru nyanyaki?

GU DUNGURATI naadu rogo bambata sa kama agarã Korosai yo adu nizubo zuboho! Bete aboro rogo dungurati akusi kparakaro niya aboro nimangipai kuti ga Moize aNdiko. Agu akurayo aya si arẽnga aboro ni gbia ngbarago be agu ahe nga ga raka te. Tipa ka sovura kuti gi ziree yugopai re, Pauro ake waraga ngarasaro ka za agu awirina naadu Korosai yo nga: “Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.”—Koro. 2:8.

² Ka gu mbedimbedi aKristano re amoiberã yo kuti gu “tata pai nga ga zegino,” ka i asa giiyo na ga Yekova gamunihe nga ga bata. (Koro. 2:20-23) Tipa ka undo yo i banda gayo wene pagume na Yekova, Pauro azungadi yo nga: “Oni mói gaoni berã ti agu ahe du ari yo, ti agu ahe du sende no te.” (Koro. 3:2) Nirengo, si aidi awirina Kristo moiberã yo tipa ka dia gu ũkumbo ka gberanga ya du ‘fuyo ngbangbaturũ yo.’—Koro. 1:4, 5.

3. (a) Gini maabangirise du mbedimbedi aKristano na ni? (b) Gini asanahe ani ka sakapai tipaha rogo gi kekeapai re?

 ³ Areme a, mbedimbedi aKristano namaa berãyo ti ga Mbori Kindo du ngbangbaturũ yo na gayo maabangirise nga kadu ni “adikumbo na Kristo.” (Rom. 8:14-17) Na ginipai du tipa agu aboro du namaabangirise ka raka auru kpotosende ane? Wai rengbe agi afugo Pauro re ka undo yo? Rogo gini gene rengbe “kura akandoro” ka maaberã yo kuti “agu ahe du ari yo” ngbaha? (Yo. 10:16) Na wai rengbe ani dunduko ka gbia undo ti gu kpiapai nga ga gu ruru akumba naadu mbata wa Abarayama na Moize, navura du rogo kpakaraapai i ki moiberã yo kindi ti agu ahe du ariyo?

4. Wai rengbe kura akandoro ka maaberã yo ti agu ahe du ariyo?

⁴ Wa vura duhe nga gu kura akandoro na gu maabangirise nga ga ngbangbaturũ te, i rengbe arengba ka maaberã yo ti agu ahe du ariyo. Ngba gini gene? Ni maa yo Yekova Mbori na agu apai nga ga Kindo mbata rogo gayo raka yo. (Rk. 10:25-27) Tipa ka manga gipai re, ani nabi Yesu ni gu boro si aida ani pekefuo gani kpiapai. (1 Pet. 2:21) Wakina agu awirinarani naadu rogo bambata sa kama agarã, ani nagbia tirani na iraira bipai, agu ayugopai nga ga zegino, na bakere nyemu aũzegino rogo gi ga Satana zegino re. (Oni gedi 2 AKorindo 10:5.) Nidu ani ni awiriki Yesu, si naida ani bandatirani wenengai rogo toro yo ti agi azubohe re.

5. Wai rengbe ani ka wisigo gaani aberã tipa aũkumuko?

⁵ Ya mo ani ima du na gu bipai du zegino na ni nga ka merafuo aũkumuko? Agu ahe ani akpinyemuhe dedede kinaha ani fura tipaha na kini mangihe. Yesu aya: “Bara ho du ga ũkumuko ni, ngbaduro du kina ku ho a.” (Mt. 6:21) Si ni wenepai ka wisigo tirani ti aregbo dũ ka ino wari du ngbadurani ni. Si naida ani sana tirani nga: ‘Mi nadia regbo wai kuti berãpa marã? Ya mo mi naaberã kina pa wai ka mi gbia sunge marã, watadu mi naʹasada kaa berã kina pa raka fiõfiõ? Watadu mi naʹasada ka maabangire ti agu apai nga ga toro?’ (Mt. 6:22) Yesu aya agu aboro naamaberãyo fuo ‘dúngura ũkumuko ni gayo rogo gi zegino re’ namaa gayo raka ngba kpakarapai rogo toro yo.—Mt. 6:19, 20, 24.

6. Wai rengbe ani ka diabe nyemu agu apai nga ga borose?

⁶ Gu zangarengba du tirani nasarani ani berẽpa kina agu apai rengbe ka sa ngbarago tirani. (Oni gedi ARomo 7:21-25.) Ka ga Mbori ziazia toro aundonga rani ya, ani ima rengba ka mbu tirani fu “gu mangaapai nga ga bitimo.” Agi apai re rengbe ka koda mangaapai ‘gbarakagbaraka na kpibuda, nyemu meteka, bau, papaya na ringo.’ (Rom. 13:12, 13) Tipa kadu na diabese kuti “agu ahe du sende no” nga agu ahe nangba ti borose, si naida ani moiberãrani ti agu ahe du ariyo. Si naida na bakere asadatise tipa ka manga gipai re. Si nga ndu gupai Pauro aya ti ni wẽ: “Mi namanga borore, ka sa ha ni kanga fere.” (1 Kor. 9:27) Si naida ani za tirani aza ka ani aida ka nye ngbagene gu ato abaangira nga ga unga. Ani wisigongo gupai ruru akumba ue amangihe bakuru kusayo ka “ngba bangiri Mbori.”—Eb. 11:6.

7, 8. (a) Gini kpakarapai Abarayama na Sara agbiatiyo na ni? (b) Ginipai Abarayama amoiberã ko fuani?

⁷ Ho Yekova aya ni fu Abarayama ko ga  na gako aborokporo ku Kanana yo, ko amangihe kinawo. Mbiko ga Abarayama idapase na giasangba, Yekova amangi mozunga na ko ki ya: ‘Mi asa ro ni bakere rikaaboro, mi ki fu maku foro.’ (Bam. P. 12:2) Ono tie, fuo agarã kusa, Abarayama na diako nangia Sara adu kindi ni airazangada. Ya mo bangiri Yekova aima go ti gu mozunga ko amangihe fu Abarayama? Kurigure, raka aadunga fuyo taata Kanana yo te. Abarayama na gako aborokporo aima mbu kpuyo na agumeyo Ura yo nangia gu bagbata nangia ga Mesopotamia. I andu nunguro nga amairo 1,000 tipa kada Kanana yo, i araka yo tii bamburoko, kini hi gomoro, na kini gbiatiyo na dungu akpakarapai. (Bam. P. 12:5, 10; 13:18; 14:10-16) Ono wa si avura duwo, i aadunga na nyemu ka ga ku Ura yo ka raka fiõfiõ raka te.—Oni gedi AEbere 11:8-12, 15.

⁸ Kuba gupai nga Abarayama moiberãko “ti agu ahe du sende no” ko ‘aidipa Yekova.’ (Bam. P. 15:6) Nirengo, ko amoiberãko ti agu ahe du ariyo nga ka maaberãko ti agu akidohe Mbori afuhe fuko. Ni sangbana gipai re, Mbori afu mosoro fuko tipa gako idapase ho ko ayugu tiko ni fuko ki ya: “‘Mo ngere ku ngbangbaturũ yo, ki gedi akerekuru, ka mo rengbe na geda ra.’ Ko ki ya fu ko, ‘Kina wo ngbatungaro ka du.’” (Bam. P. 15:5) Nairiwo wai gipai re afu maabangirise fuko! Agu aregbo dunduko Abarayama anaangana akerekuru ku ariyo, si anaatingida ko na pa wai Yekova akido ko nga ngbatunga ko nika nge ni bakerehe. Ho regbo ada ni be Mbori, ko afu gude fu Abarayama a wa ko akido ko.—Bam. P. 21:1, 2.

9. Wai pekafuo gu kpiapai nga ga Abarayama angarasa rani ani nye ti ngba ga Mbori sunge?

⁹ Wakina Abarayama, ani nasungudo gu regbo Mbori nika digiso gako akidohe ti ni. (2 Pet. 3:13) Ka ani amaanga berãrani ti agu ahe du ariyo ya, ani rengbe ka bi gupai nga agu akidohe re naima ni kerehe na ani ki tona ka zera ti manga agu apai nga ga toro. Ni kpiapai, ya mo mo ambunga pa kura gamo apai tipa ka mangasunge abazakigene watadu kura asunge nga ga kindo? Ka ngia wo duhe, si naida i tambua ro atambua. Na ginipai du tipa ro awere? Mo tingidi gupai nga, Abarayama amoiberã ko ti “gu bakporo du na nyanyaki mburuhe ti ni.” (Eb. 11:10) Ko “aidi gu pai Mbori agumba, si du Mbori aya ti ni ko ni ruru ko.”—Rom. 4:3.

10. Gini ngbatunga raka Moize arakihe ho ko adu ni ni paranga?

¹⁰ Gu kura boro namoi berãni ti agu ahe du ariyo angia Moize. Ho Moize adu ni ni paranga, i ‘ayugu gu tatamana nga ga aEzipeto fuko dunduko.’ Gere aangianga kungba wirikapai gbua te. Moize aaraka kua Faro Ezipeta yo, nangia nyanyakipa gbata ti agu aregbo re. Mbiko gu wirikapai Moize agbiaha, ‘ko adu na tandu ti gako pai na sabeko.’ (Amo. 7:22) Mo berẽnga pa gu momu ko adu na ni! Wa si avura du wo, Moize amoiberã ko ti guhe paha anyaki gbe nga manga gupai Mbori akpinyemuhe.

11, 12. Gini wirikapai Moize abihe na kikiipaha, na wai ani aino gipai re?

¹¹ Ti tonatona ga Moize raka, nako nangia Yokebede, aima yugopai fuko tipa gu Mbori nga ga aYisaraere ko. Moize abi gu inohe nga ga Yekova na kikiipaha susi aũkumuko. Ko aabingo pa agu amomu pa sungu kua Faro yo arengbe ka ye na ni fuko na kikiipaha te. (Oni gedi AEbere  11:24-27.) Nirengo, gu inohe ko agbiaha be nako na gako idapase kuti Yekova naasako ko moiberãko ti agu ahe du ariyo.

¹² Moize agbia gu wene wirikapai nga ga zegino naadu ti gu regbo re, ono ya mo ko amangisunge na ni tipa ka gbia worimo watadu ka gbia aũkumuko? Oó. Wa ka ko amangihe wo, ka ko akanga “i niya ti ko wiri gu de nga wiri Faro te. Ko asia kina gu pai nga i mangi ko gbegberẽ dagba ga Mbori aboro, susi gu pai nga ngi tipa rago ngbutuko rogo gu ngbarago nga ga ingaapai.” Si tie ziazia nga, Moize amangisunge na gu inohe nga ga toro ko agbiaha tipa ka manga ga Mbori pai na ni.

13, 14. (a) Ginipai naundo Moize ko rẽ tipa gu sunge si adu nga Yekova nika fuhe fuko? (b) Wakina Moize, ginipai si aida ani mangihe?

¹³ Moize akpinyemu Yekova na gako aboro. Ho garãko ada ni nga 40, ko aberẽ gupai nga ko ima rẽ ka kusa ga Mbori aboro be sunge kanga Ezipeta yo. (Amo. 7:23-25) Ono tie, mbata fu Yekova fu sunge fu Moize, gu kura pai kinaho si aaida ko mangihe. Si aaida ko sonosi agu asino duwa umbasitise, zerangbaduse, na zatise. (Snz. 15:33) Si aaida Moize gbia gu rabahe narengbe ka undo ko ko hi agu aʹasada na akpakarapai naadu fuko ku mbatayo. Mangasunge banda akandoro tipa bete agarã aundo ko tipa ko sonosi agi asino re.

¹⁴ Ya mo Moize awirikipai ti gu rabahe ko agbiaha ni babanda akandoro? Si aima undo ko! Fugo Mbori naya Moize ada ni “bayee boro ni rengo, ki susi agu aboro nadu ri kpotosende dunduko.” (Geda 12:3) Ko aima sonosa gu sino nga ga umbasitise, si aundo ko tipa ko mangipai zezeredi na dungu ngbatunga aboro na gayo akpakarapai. (Gate 18:26) Wakina gure a, si naida ani sonosi agu asino nga ga toro nika undo rani ani susi rogo “bakere gberãngbi” ku rogo ga Mbori vovo zegino. (Yugo. 7:14) Ya mo ani naagia tirani na agu aboro ani abiyo nga si ima kpakara tipa ka mangapai na yo? Si naida ani mangipai kuti sangba gu mokedi nangia Petero nazungodi akurako aidipase ki ya: “Oni írisi aboro dunduko. Oni kpí nyemu awirina.”—1 Pet. 2:17.

15, 16. (a) Tipagine nyakipa gupai ti ni nga ani moiberãrani ti agu apai du ni ruruhe? (b) Tipagine nyakipa gupai ti ni nga ani banda gaani ruru mangapai?

¹⁵ Ani naraka ti “gbegberẽ rago.” (2 Tim. 3:1) Sidu, si naida ani moiberãrani ti ruruapai tipa ka nye wenengai rogo toro yo. (1 Tesa. 5:6-9) Ani wisigongo wai rengbe ani ka manga gipai re rogo gaani gene raka yo rogo apai biata.

¹⁶ Gaani sino mangapai: Petero aima inopa nyaka wene sino mangapai. Ko aya: “Gaoni mangapai ki du ni wene he ku bangiri aGendiria; . . . i ki taasi rimo Mbori rago ye ko mbiko bi yo wene mangaapai.” (1 Pet. 2:12) Singia ani kporo, basunge yo, sukuru yo, ba-mbaro yo, watadu gene tungusapai yo, ani mangi ome tipa ka fu taarimo fu Yekova rogo gaani mangapai. Nirengo, ani nga kpakpa aboro namanga ingahe amanga. (Rom. 3:23) Ka ani nye kuti “só gu wene vura nga ga idapase,” ani duadu na diabese kuti gaani zangarengba.—1 Tim. 6:12.

17. Wai rengbe ani ka wirika gu bipai Yesu Kristo adu na ni? (Oni bi gu sura duti tonatonaha.)

¹⁷ Gaani Bipai: Ruru bipai nandu sa na banda wene sino mangapai. Pauro aya: “Oni dú na gi berã rogo roni yo re, nadu  rogo Kristo Yesu yo a.” (Frp. 2:5) Gini ngbatunga bipai Yesu adu na ni? Ko adu na umbasitise. Umbasitise naasa ko ko mbupa kura gako apai tipa sunge tungusapai. Tungusa wene pangbanga nga ga Kindo fu kura aboro angia gupai paha anyaki berãko yo gbe. (Mk. 1:38; 13:10) Yesu aabi Fugo Mbori nga si naida ko nimangi gupai si apehe. (Yo. 7:16; 8:28) Ko anaawisigo Ziazia Kekeapai kakaka tipa ka pe agu apai du rogoho, ka songodaha, na ka saka rogoyo fu aboro. Ka ani du na umbasitise na kini tungusipai zaaza, na kini wisigi Ziazia Kekeapai, gaani berãpai nika du wa ga Kristo.

18. Gini nyanyakipa gene rengbe ani ka undo ga Yekova sunge ngbaha?

¹⁸ Gaani undo: Yekova mangi mbakadapai nga “arukusue ninugadi ni rimo Yesu dunduko, agu ahe du ngbangbaturũ yo, [na] agu ahe du auru kpotosende.” (Frp. 2:9-11) Wa vura du Yesu na kikiipa ko, ko nika aumbasipa tiko umbasi tipa ka manga gupai Bako akpinyemuhe, kina gu bangisapai re si aida ani mangihe a. (1 Kor. 15:28) Ngba gini gene? Nifu ani tirani na ngbadurani dunduko ka manga gu sunge i nafuhe furani nga ka “sa arikaaboro dunduko ni abawiriki.” (Mt. 28:19) Si naida ani “mangi gu pai amanga ngba angba fu aboro dunduko,” fu gaani amurakporo na fu awirinarani.—Gara. 6:10.

19. Ginipai si aida ani diberã ka mangaha?

¹⁹ Nairiwo gu ngbarago du ani na ni nga Yekova natingida rani ani moiberãrani ti agu ahe du ariyo! Tipa ani rengbe ka manga gipai re, si naida ani “oro gu oto [abaangira] du fu rani ku mbata yo kindi” na hipai. (Eb. 12:1) Oni dunduko mangingo ho amanga “na kpotoroni yo wa manga ha fu Gbia,” na gu Baroni du ngbangbaturũ yo nika fu maku afu furoni kurii gu ome oni amangaha.—Koro. 3:23, 24.