Satana wakina gu wege nga karbon monoksaidi re mbiko ka ani bingo ko te na ko nga kere boro. Ono Mbori ima fu guhe rengbe ka undo rani. Mo arengbanga ka gunde be Satana te ka si du nga mo namangasunge na agi agamahe re.

Gu ome du siapai. Yakobo 4:7 naya: “Oni ká fu bakitingbanga, ko ki oro be roni.” Wa vura duhe nga Satana na ome tiko, ko arengbanga ka manga ro ngbaome mo mangi gupai mo aidanga na ni ya te. Mo na kina siapai bero. Bambata Petero 5:9 naya: “Oni ká fu ko [Bakitingbanga] ki ru nyanyaki rogo idapase yo.” Mo tingidi gupai nga, Satana ambu fuo Yesu ho ko aru ni nyanyaki sa agu aˈasada biata ko aye na ni sako. (Matayo 4:11) Mo ima rengba ka manga kina gu bangisapai re a.

Bakure na Mbori. Yakobo 4:8 nangarasa rani tipa ani “mbédi na Mbori.” Yekova nayamba ro mo zi wene bakure na ko. Wai rengbe mo ka manga gipai re? Gu wene gene rengbe mo ka mangaha ngbaha nga ka wirikapai tipa ko rogo Ziazia Kekeapai. (Yoane 17:3) Gupai mo nika wirikaha tipa Yekova re nika saro mo kpinyemuko, na gu nyemuse re nika fõngbaduroyo tipa mo mangisunge fuko. (1 Yoane 5:3) Wa mo ambeda na gu Bamo du ngbangbaturũ yo, gako karagapai nika ngia gine? Yakobo ape kurapai nga ka mo mbedi na Mbori ko ‘ambeda na mo’ a.

Gu kidohe du tipa bandahe.Asanza 18:10 naya: “Rimo Yekova nga nyanyaki tumbatumba gbata; ruru boro naora koyo ki du zezeredi.” Kina rengo nga, rimo Mbori wa kura te. Kuba gure, si nayugo  gupai nga agu aboro nzunzu nagunde ti rimo Mbori rengbe arengba ka sanako tipa bandahe.

Ndikidi Kpiapai. Amokedi 19:19 nape gupai furani namangi tipa agu aboro naada ni aKristano Efesa yo niya: “Agu yo ni umba yo te nanasoroka i ki dungura gayo akitabu, ki zo ho azo ku bangiri aboro dũ; i ki gedi marãha, ki bi he ya si du wa marã feda 50,000.” * Agu aKristano re agbarasipa agu ahe dunduko nangia ga sangbaatoro naadu beyo, wa paha avura nyaka vurũ. Gi gayo kpiapai re nayugo dungu wenepai furani areme. Gi zegino re ima hi be sunge sangbaatoro. Zavura agu aũ sangbaatoro na agu amangapai ani abihe nga si agberãnga te, si ima rengba ka ye na adaimona kuti boro. Si naida mo bafu ngbatunga agu ahe re abafa kusayo tiro, ka paha vura nyaka wai vurũ.—Pa Fu Rugute ni Ue he 18:10-12.

Rogelio ani nifura tipa ko rogo bambata kekeapai aidanga kuti gupai nga Bakitingbanga kina ti ni vuru agu agarã 50 ko araki he te. Ono kusa, ko aye ka wisigopai tipa gi gako biapai re dudunguro. Tipagine? Ko aya: “Ho mi agbia Ziazia Kekeapai ni ni bambataha rogo gimi raka yo, gu inohe du rogo Ziazia Kekeapai aundo re mi idi kuti gupai nga Bakitingbanga kina ti ni. Gu bangisa inohe re nabanda re awere ka mi zingo ti gako gbina ya.”

Ya mo mo adu na ngbarago ka si du nga Satana berewe ti ni te? Ii, rengo du. Ziazia Kekeapai nafura ku mbatayo tipa gu regbo i nika ‘ba bakitingbanga ku rogo gu ngirimo we nagbi na baruti.’ (Yugoti 20:10) Kina rengo du ngaha nga, kungbo we na baruti arengba ka mangapai na gu boro nga toro te. Sidu, gu ngirimo we furayo tipaha re narukuba nyenye gbarasahe. I nika gbarasa Satana nyeanye kindi. Nairiwo gu ngbarago akpinyemu Mbori nika du na ni re!

Wa du rago re, mo nindu ku mbatayo kindi na wirikapai tipa Yekova gbiati gako agene. * Mo berẽnga kina gupai nga mo ni unga ro na kini ya nirengo wẽ, “Satana ti ni berewe te!”