Kura aboro nabihe nga kparakpee nga gbirisa regbo gbua, na boro ho nadegatuni furani te. Gu kura aboro ima asada ka kpara fu Mbori ono i bihe nga i agbianga karagapai kutini te. Boro sa dagba agu aboro naya Mbori ti ni te akusi gako bipai tipa Mbori na ki kpari nga: “Mo furanga fere kandara tooni rogo patapata yo.” Ko aya Mbori “aakaraganga pai fuko te.”

Ono tie, Ziazia Kekeapai nakido rani nga ndikidi Mbori kina ti ni na ko nadegatuko adega kuti kparakpee. Ziazia Kekeapai aima pe gipai re fu aboro bakuru kusayo ki ya: “Ko [Mbori] adú na undahe fu roni ni rengo kuti paa gaoni kpe; ho ko ka gia ha ni, ko akáraga pai fu roni.” (Yesaya 30:19) Kura veresi rogo Ziazia Kekeapai naya: “Ga ruru boro kparakpe ngba ti ko.”—Asanza 15:8.

Ziazia Kekeapai a na agu akpiapai rogoho nga ga agu aboro Mbori agi gayo kparakpee. Veresi sa naya Yesu ‘afu nyanyaki akpe fu gu ko narengbe na batasa ko,’ na Mbori aima ‘gia pako.’ (AEbere 5:7) Gu kura akpiapai gu du rogo Daniere 9:21 na 2 Pekapai 7:1.

Tipagine tie aboro abihe ti ni nga i agbianga karagapai kuti gayo akparakpee te? Ka ani aida na karagapai kuti gaani akparakpee, ani duwa ka ani kpari sa fu kina gu Mbori nga ga Ziazia Kekeapai ko nga Yekova, * angianga fu gu kura mbori watadu fu atita rani ya. Mbori naida ani “ho gu he [du] ku sangba gako nyemuhe yo” nga agu ahe ko naidi paha. Mbori nakido rani nga ka ani kpari ngba gi gene re, “ko gi pa rani agia.” (1 Yoane 5:14) Sidu, ka ani aida Mbori karagapai kuti gaani akparakpee, si naida ani ini gu Mbori nga ga Ziazia Kekeapai ko na ki wiriki gupai ko akpinyemuhe.

Dungu aboro ima ida kuti gupai nga anga kparakpee gbua nga gu kungbopai aboro pambori amangaha te, ono Mbori nadegatuko adega kuti akparakpee na kini karagapai kutini. Isaac du Kenya yo aya: “Mi akpari fu Mbori ko undore mi girogo Ziazia Kekeapai yo. Fuoho aaturõngo te, boro ki ye fuore na ki undo re na gupai mi aidaha.” Hilda du Philippines yo aaida ka mbu vugundö. Fuo ri asadi ka mbu ru bara dunguhe zanga du na diabese, kumbari apepai furi nga, “Tipagine ka mo akparanga ti ni fu Mbori ko undo ro ya?” Ri amangisunge na gu rugute re na ki ya: “Ngbare aima zera ka bi wai ko aundo re. Si adu wa ka i ya nyemu gu gundö naadu tire aima tona ka go. Na mi ki mbu ru.”

Ya mo Mbori rengbe kadu na nyemu ka undo ro na agu apai namanga ro du na ngbanya ku sangba gako nyemuhe yo?