Wiri tooni degude abi ngime si nikuru rii bambu mbakada ahe yo si kini tona kaa kio ki satihe wakina rungbutorungbuto mai. Ri ada kuti gupai nga, ndu gupai i ambakadi bambu mbakada ahe ti ni nga si ni kusi rungbutorungbuto mai. Ngbatunga gi wiri zanga giarogopai yo nga ga gude re rengbe ka ba kina mongo tirani. Ono tie, bakere zanga giarogopai yo ima rengba ka du na bakere ome kurii gaani raka. Ni kpiapai, ka boro zanga giarogo agu apai du ni kekehe ti kpoto dawa, si ima rengba ka ye na gbegberẽ sangbanaha.

Zanga gia rogo agu apai yo nga ga toro ima rengba kadu na kere sangbanaha a. Ni kpiapai, kura aboro aagianga rogo ga Yesu yugopai yo te. (Yoane 6:48-68) Kuba gupai nga i wiriki dungu apai, i aká agu apai dunduko nga gu Yesu ayuguhe. I aima zanga dungu apai ni rengo!

Ya mo mo naakeda Ziazia Kekeapai tipa si yugu gene foro? Ka ngia wo du, gure nga wenepai. Ya mo kerepai ho ti zanga gia rogo gupai yo mo nagedihe? Si namanga dungu aboro. Ani makianga apai biata nga gu aboro azanga gia rogoho yo.

• Kura aboro nazanga gia rogo gu ndiko nga ga Ziazia Kekeapai du tipa “gúnde ti Mbori.” I naberã gupai nga Mbori nika imo gu boro agunde nga tiko ya. (Batungusipai 12:13) Ono Mbori aidanga gupai nga agu aboro nairiso ko i ni berẽpai wa gure tipa ko te. Ko naya: “Ka mo gúnde nga ya, mbiko mi du na mo, ka mo kío nga ya, mbiko mi nga ga Mbori; mi anyákasa ro, mi aúnda ro.” (Yesaya 41:10) Ka gunde Mbori ni wiri guruhe nga, kaa berãpa iriso ko na kini yugu dudunguro iriso tipa ko.

• Kura aboro nazanga gia rogo agi afugo ga Mbori toro adu kugii pa kehe re: “Were ahe na regboho ti ni dunduko, . . . rago tipa vunga, na rago tipa kpio.” I nada kuti gupai nga Mbori aima ringbisa agu aba na agu aregbo aboro nika kpi ti ni ni basasa dunduko. (Batungusipai 3:1, 2) Ono tie, agu afugo re nagumba kina gupai namanga rogo raka yo, si nayugo gupai nga kpio nga guhe du tipa aboro dunduko. Fugo Mbori nayugo gupai a nga, gaani adiaberã ima rengba kadu na sangbanaha kurii bagizo gaani raka. Ni kpiapai, ani nageda gupai nga: “Gunde ti Yekova nagizasi arame.” (Asanza 10:27; Atambuahe 90:10; Yesaya 55:3) Wai rengbehe ka du wo? Ni kpiapai, pa du ani nairiso kuti Fugo Mbori nika fõ ngbadurani yo ani ne manga gu gbegberẽ apai du wa kpibuda gbiati wasiwasi mangapai.—1 AKorindo 6:9, 10.

• Kura aboro nagia rogo gupai Ziazia Kekeapai agumbaha kina wai si apehe nga kpotosende gbiati ngbangbaturũ ni “igiigi he be kina gu pai re tipa we,” na i da kuti gupai nga Mbori nika gberesa gi kpotosende re agbarasa. (2 Petero 3:7) Ono Mbori nakidohe nga, ko ambunga gi kpotosende re i gberesi he te. Mbori “namoi amburu kpotosende ka i agbisa nga ha waragoagira ya.” (Atambuahe 104:5; Yesaya 45:18) Gu gbegberẽ mangaapai nga ga gi sino raka re du i nika gbarasaha na we nyeanye kindi, angianga gi ndikidi kpotosende re ya. Ono tipa angbangbaturũ, ho boro agiarogo ho yo ni kina wai duhe, si rengbe ka du nga haurago, gu papara ngbangbaturũ du akerekuru rogoho, watadu si nga gu banye nga ga Mbori. I agbarasanga he sa dagba gere te.

A wa mo nabihe rogo agu akpiapai nga ga agu aboro re, dedede, aboro nazanga gia rogo agu apai i agedaha rogo Ziazia Kekeapai yo. Ono tipagine Mbori nambu gupai re ti ni si niimangi? Kura aboro nabihe nga: ‘Ka singia Mbori nga iratatamana na ki ngia gu boro naima ino apai dunduko, ka ko arengbe arengba ka kusa gu buku nga gu i akehe ngba wene gene si kidu taata fu aboro tipa i gi rogoho yo. Tipagine ko aamanganga ha ti ni wo ya?’ Ani makianga ndu apai biata aboro azanga gia rogo Ziazia Kekeapai yo ti ni dedede.

1.   I akusi Ziazia Kekeapai ngba gu gene kina agu aboro du na umbasitise gbiati nyemu wirikapai narengbe ka gia rogoho yo. Yesu agumba gupai fu Bako nga: “Mi natambua ro, Buba, Gbia ngbangbaturũ na sende, ya mo aoko agi apai re be airatatamana na airainahe, ki yugu he fu toni agude.” (Ruka 10:21) I ake Ziazia Kekeapai ngba gu gene kina agu aboro du na ruru ngbaduyo yo na rengbe ka gia rogo agu apai du rogoho. Aboro rukö—gu sino nga ka du ni “airatatamana na airainahe”—nasa boro ka ni ginga rogo Ziazia Kekeapai yo ya. Ono agu aboro nageda Ziazia Kekeapai na ruru bipai wa ga “toni agude”—na umbasitise na kidu na nyemu ka wirikapai—i nagbia mosoro nga ka gia rogo Fugo Mbori yo wenengai. Nairiwo gu tatamana Mbori akusi Ziazia Kekeapai na ni re!

2. I ake Ziazia Kekeapai fu agu aboro naida Mbori undoyo tipa i gi rogoyo. Yesu ayugu gupai nga, si nika ida i undo aboro aundo tipa i gi rogo gupai nzunzu ko aayugoho. Wai gu i arengbe ka gbia gu undo re? Yesu asakirogo yo ki ya: “Gu Mounda, nga Ziazia Toro, gu ko Buba ka keda ko ni rimore, ko ayugo apai dunduko fu roni.” (Yoane 14:26) Si du, Mbori nafu gako ziazia toro—gako nyanyaki ome mangapai—tipa si undo aboro i gi rogo agu apai i agedaha rogo Ziazia Kekeapai yo. Ono tie, Mbori nadia gako toro kusayo ti agu aboro aidanga ka kido kuti ko tipa undo ya, si du, Ziazia Kekeapai nadu ni kpakarakpakara ha fuyo tipa i gi rogo yo. Ziazia toro nafõ ngbadu agu aKristano du na bakere inohe i ye ka undo agu aboro naida ka gia rogo Ziazia Kekeapai yo.—Amokedi 8:26-35.

3. Kura apapara Ziazia Kekeapai kinaho aboro narengbe ka gia rogoho yo ti gu regbo rẽarẽ. Ni kpiapai, i aya fu gu nebi nangia Daniere ko kepai tipa kumbatayo. Maraika aya fuko: “Daniere, mo kísi agu apai re ki dika he ti gu kitabu re, dati digida ragoho.” Tipa dungu kama agarã, dungu aboro aima geda gu buku nga ga Daniere ono ka i arengbanga na gia rogoho yo nzunzu ya. Ni rengo, zavura Daniere nitiko aagianga rogo bete kura apai yo ko akehe te. Ko aidihe nitiko ki ya: “Mi agi pa ha ono mi aruga nga tire na ni te.” Niyangaraha, aboro arengbe ka gia rogo gu sangbanebi wenengai nga ga Daniere ti kina gu regbo nga gu Mbori aringbisihe. Maraika asaki rogoho ki ya: “Mo ndú ngba ga gene, Daniere, bambiko i kisi agu apai re dũ ki dika ha ki da ho digida ragoho ka da ni.” Da narengbe ka gia rogo gu pangbanga nga ga Mbori re? “A nga gu ni sa dagba gbegberẽ yo yo nikaruga tini na pai te; ono agu yo du ni airatatamana i nikaruga tiyo na ni.” (Daniere 12:4, 8-10) Si du, Mbori nayugo rogo kura apapara Ziazia Kekeapai yo ti kina gu regbo daada bangiriko.

Ya mo pa susa regbo ni gbangaha asanga aDezire Yekova i zanga gia rogo Ziazia Kekeapai yo? Ii. Ono ho ga Mbori regbo ada ni tipa ko rugusi gupai re, aDezire Yekova narugusa gayo gia rogopai yo kina kuti ni. I idi kuti gupai nga, i nawirika ga Yesu amokedi nanaaruga gayo aberã ho Yesu anaaruga yo ni.—Amokedi 1:6, 7.

Ga tooni degude iraira berãpai tipa wari rungbutorungbuto mai naaye ni ima rengba kadu nga wiri tooni zanga gia rogopai yo. Ono tie, gupai Ziazia Kekeapai ayugoho na nyanyakipa ha foro. Gu pangbanga du rogo Ziazia Kekeapai yo ni kpakarakpakara ha fu ai boro tipa ni gi rogoyo ni tini ho ni agedaha ni nisani. Si du, si naida mo gbata undo tipa ka gia rogo gupai yo mo agedaha. Mo gbata agu aboro nawisigo Ziazia Kekeapai na umbasitise, agu aboro nakido kuti ga Mbori ziazia toro tipa si undo yo i gi rogo Ziazia Kekeapai yo, gbiati agu aboro naima ida kuti gupai nga ani naraka ti gu regbo Mbori aida ani gi rogo Ziazia Kekeapai yo susi gu nadu mbata. Mo fura na aDezire Yekova watadu mo gedi agu apai du rogo gayo bangiriba nga ga Internet nga jw.org/zne. Ziazia Kekeapai nakidohe nga: “Ka mo akpara ku ari tipa rugatinapai . . . , si du mo ka bi gu inahe nga ga Mbori.”—Asanza 2:3-5.