Rogo gu wiso nga ga Wegebe 24, 2022, agu abanzengere nga ga Russia yo atona ka rimo na vura ku vuru Ukraine, si ki vura du nga abazogo nga ga zegino yo namanga ome ka sa gupai nga ka vura mangingo ya. Waigu rengbe gi vura re kadu na maapai kurii zegino? Gu bangerekurii sunge nga ga United Nations (Yu-eni) ko nga, António Guterres, agumba gupai bete aˈuru kusayo nga: “Si ima kpakara ka berã pa wai gi vura re nika ye na rungo gbiati gbarasahe na wai gipai re nika du na maapai kurii gu ngbabase nga ga agu aringara du putu yo na rogo zegino dunduko.”

•   Yesu Kristo agumba pa gu regbo kumbatayo si adu nga “rika aboro azínga kuti gu rika aboro, ngbi ki zingi kuti gu ngbi.” (Matayo 24:7) Mo gedi gu kekeapai nga “What Is the Sign of ‘the Last Days,’ or ‘End Times’?” ka bi wai Baibiri ayugo gupai nga agu avura namanga areme nadigiso ga Yesu sangbanebi.

•   Gu kitabu nga ga Baibiri nga Yugoti aima fura kumbatayo tipa avura ho si afura ni tipa gu bandu rii farasi “nga zamba ru” nga gu ru na ‘di zereda auru kpotosende.’ (Yugoti 6:4) Mo gedi gu kekeapai nga “Abandurii Afarasi Biama—Ada Nga Yo?” ka bi wai gi sangbanebi re ayugo pa gu vura du areme.

•   Gu kitabu nga ga Daniere afura kumbatayo tipa abakindo ue nga “gu bakindo du ku sudiyo” na “gu bakindo du ku nodiyo.” (Daniere 11:25-45) Mo bi gu vidio nga Digisidigisi Sangbanebi—Daniere Kapita 11 tipa ka ino ndu gupai rengbe ani ka ya ti ni Russia na agu aringara nasongodaha nga bakindo nga ga nodiyo. a

•   Yugoti afura a tipa “gu vura nga ga gu bakere rago nga ga Mbori, nga gu ko du na tandu apai dũ.” (Yugoti 16:14, 16) Ono tie, anga gi vura re dagba aringara wa gu ani abihe awere te. Mo gedi gu kekeapai nga “Gine Nga gu Vura Nga Aramegido?” tipa ka ino gu kura apai tipa gupai nika manga kumbatayo re.

•   Baibiri nagumba gupai nga Mbori nika mangapai “vura nyasi digida kpotosende yo.” (Atambuahe 46:9) Mo gedi gu kekeapai nga “A Real Hope for a Better Tomorrow” tipa ka ino gu kura apai Mbori nakidopaha.

•   Yesu ayugupai fu apefuoko tipa i kpari tipa ka Mbori Kindo si ye. (Matayo 6:9, 10) Gu Kindo re nga gu zogararago nga ga ngbangbaturũ nga gu nika manga gupai Mbori akpinyemuhe auru kpotosende, na gupai Mbori akpinyemuhe nakoda padu zereda rogo zegino dunduko. Tipa ka ino wai rengbe gu Kindo re ka undo ro, mo bi gu vidio nga Ga Mbori Kindo Nga Gine?

 Bange aDezire Yekova naima susa 129,000 naraka Ukraine yo. Wakina gu kura aDezire Yekova du rogo gu kura aringara, i nawirika Yesu ninye yo ni kparakpara yo ti agu apai nga ga birĩ-zogarago na ki zanga ka rimiso tiyo kurogo sovura. (Yoane 18:36) Rogo zegino dunduko, aDezire Yekova nandu kumbatayo kindi kaa takapande gu “wene pangbanga nga ga ngbi” ni gu yangara ziga du kuti gu kpakaraapai wiri aboro agbiatiyo na ni, kodihe na avura. (Matayo 24:14) Ani nahõpai bero mo sanahe tipa ka ino gu kura apai Baibiri agumbaha tipa maabangirise kumbatayo.