Mikaere, nga guko bete kura apambori naayamba ko nga “Santo Michael,” wa goapai ayugoho, si nga gu rimo Yesu adu na ni mbata fu ko ye ku auru kpotosende no na si nga gu rimoko i afuhe berewe fuko tingbafuo ko nyasi gako raka auru kpotosende no. * Mikaere asovura na Satana tingbafuo kpio Moize na ki undo maraika ni gumba gupai Mbori akedi ni na ni fugu nebi nangia Daniere. (Daniere 10:13, 21; Yuda 9) Mikaere naraka ringbisihe kuti rogo rimoko yo—du nga “Da du ho wa Mbori?”ko nasongodapai kubara ga Mbori zogarago yo na kini sovura kuti avura Mbori.—Daniere 12:1; Yugoti 12:7.

 Mo bingo ndu gupai rẽhe arẽ ti ni ka da kuti gu digisopai nga Yesu nga gu bakumba maraika nga Mikaere.

•   Mikaere nga “bakumba maraika.” (Yuda 9) Gu rimo nga ga sunge nga “bakumba maraika,” rogoyo nga “gbia nga ga amaraika yo,” si kuru rogo averesi yo ue gbua rogo Baibiri yo. Rogo agu abangiriba dunduko si nakuru rogoho, i mangisunge na gu fugo nabipa bangisa boro, nayugo gupai nga maraika ho gbua sa du na gu rimo nga ga sunge re ri ni. Veresi sa dagba agu averesi re nape gupai nga Gbia Yesu nga gu ko nazingi be kpio “nikazorã tigako ngbangbaturũ yo, na bakere tata ngba na fugo bakumba maraika.” (1 ATesaroniko 4:16) Yesu “na fugo bakumba maraika” mbiko ko nga gu bakumba maraika nga Mikaere.

•   Mikaere nga bangbembatayo fu gu riivura nga ga amaraika. “Mikaere na gako amaraika ki so vura na daragona,” Satana. (Yugoti 12:7) Mikaere na bakere pagbia kurii gu kusikusiahe nga atoro, mbiko i nayambako nga “gu ko dagba gbia abazogo” na “bakere bazogo.” (Daniere 10:13, 21; 12:1) Agi arimo nga ga sunge re, nayugo Mikaere ni “bangbembatayo fu gu rimbasa riivura nga ga amaraika,” ringbisihe kuti wai gu wene bawirikipai tipa Vovo Ndiko nga David E. Aune akehe.

   Baibiri yambu kura rimo boro gbua sa du na pagbia kurii gu rimbasa riivura nga ga amaraika. Si sakipai tipa “rago yugo Gbia Yesu ngbangbaturũ yo na amaraika gako tandu ni mirã we, Ko aíra bape.” (2 ATesaroniko 1:7, 8; Matayo 16:27) Yesu “andu ku ngbangbaturũ yo; amaraika ki du ni zogozogo yo fu ko na abazogo na atandu.” (1 Petero 3:21, 22) Si arengbanga ka ru ani berẽ gupai nga Mbori arengbe ka sia Yesu gbiati Mikaere i du ue ni abangbembatayo fu ziazia amaraika te. Kuba gure, si ima rẽ ani berẽ gupai nga agu arimo ue dunduko re nga Yesu gbiati Mikaere, nga rimo bangisa boro sa.

•   Mikaere nika ‘gúari’ ti gu kere “rago fuda” naamanganga mbata ya. (Daniere 12:1) Rogo gu buku nga Daniere, gu fugo nga “agúari” dedede, i namangasunge na ni ka fura tipa gu bakindo naguari ka manga nyanyakipai ngba iiriwo gene. (Daniere 11:2-4, 21) Yesu Kristo nga gu ko i ayambako nga “Ga Mbori Pai,” nika guari ka manga iiriwopai wangia ko “Bakindo ri abakindo” ka nyasa riipa avura Mbori dunduko na ki banda ga Mbori aboro. (Yugoti 19:11-16) Ko nika guari ka manga gipai re ti regbo “bakere gberãngbi nikadu, wa zegino aenge da awere si adu nga wo te.”​—Matayo 24:21, 42.