Bara ue vuru aposo yo ni basasa, aDezire Yekova naamanga adunguratise rogo gayo aba irisombori nga gu i ayambaha nga aBambu Kindo. Gini apai ninaamanga yo, na waigu rengbe mo ka gbia undo ka mo ndu koyo?

•  Ginipai ninaamanga Bambu Kindo yo?

•  Tipagine si aida mo ndu tipa adunguratise ti ni?

•  Gupai akuaro agumbaha

 Bambu Kindo nga gu ba aboro awirika wai rogoho ka mangapai kuti agu apai Baibiri ayugoho. Agu adunguratise i amangaha yo ima rengba ka undo ro tipa:

•   mo wiriki gu rengo du tipa Mbori.

•   mo rugu tiro wenengai na pa agu apai namanga ti gi regbo re.

•   mo da ni wene boro.

•    mo gbia wene abakure.

 Ya mo mo iningo gipai re? I nayamba gu ba irisombori nga ga aDezire Yekova nga Bambu Kindo mbiko ga Mbori Kindo nga gupai i afura yo dedede tipaha.—Matayo 6:9, 10; 24:14; Ruka 4:43.

 Agu apai du yo nika undo ro aundo. Gu bangua arugute nga ga Baibiri nga gu i asakapai tipaha ti regbo ga aDezire Yekova adunguratise nika undo ro mo “nigbata tatamana.” (Asanza 4:5) Nayugo gupai nga, Baibiri ima rengba nzunzu ka undo ro mo mangi wene adiaberã rogo raka yo. Si ima rengba ka undo ro a mo gbia akaragapai kuti kikindigi asanahe du rogo raka yo nga gu nakoda:

•   Gini ndupai aboro araka ti ni?

•   Ya mo Mbori du si aida i birako tipa gaani arungo?

•   Ginipai ninaamanga ho ani akpi ni?

 Gi rii-apai du kusende re, nga gu bete rii agumbapai i naamangaha ti regbo gu gaani adunguratise nga ga digido poso:

•   Tipagine si Aida Baibiri Ningbe ti ni Furani Kumbatayo?

•   Wari Rengbe Oni ka Gbia Undo ni ti Regbo Fudifudi Apai?

•   Gupai ga Mbori Kindo Amangaha Furani wa du Ragore.

 “Kura gude sa rogo gi riko aye tipa adunguratise. Ko asungu wa sa na gimi aborokporo, na ani kini gedi agu abuku naadu berani sa na ko. Fuoho, ko agumba gupai fere nga, ngbako niima zera na agu akaragapai aboro naafuhe ti regbo gu paparaha nga gu ni naaida aboro fu karagapai. Ko agumba gupai fere a nga, rogo gayo kanisa, awaraga beyo nga gu i awisigo pai rogoho wa gu du berani te re.”—Brenda.

 Ya mo mo iningo gipai re? Agu aba i asunga riihe Bambu Kindo yo re, si gbua, i arogodanga marã tipaha te.

 Gu kodatise nga ga awirina nika ngarasaro. Baibiri nagumba gupai nga, gu ndupai si aida aKristano naadunguratiyo ti ni kurogo ba sa nga ‘kaa nyakasa tiyo dagba tiyo.’ (AEbere 10:24, 25) Gu wene kodatise du dagba agu aboro naberãpa Mbori na namaa akurayo mbatayo kuba gupai nga kaa berãpa tiyo nafu wasa rogo gu zegino naima hi be kina gu sino nga ga gbangbati re.

 “Tingbafuo gbanga uru, mi nidu na gberãrago na kidu na mbugo, ono agu aboro du Bambu Kindo yo ninaasa re ti aregbo dũ mi du wenengai. Ho mi naaga ni ku kporo yo tingbafuo nyasa adunguratise, mi nidu na ngbarago na kidu regerege tipa gu kura uru.”—Elisa.

 Ya mo mo iningo gipai re? Bange adungurati nga ga aDezire Yekova rogo zegino dunduko, ima susa 120,000 nga aguyo nadunguratiyo kurogo aba naima susa 60,000. Rogo agarã nibasasa, bange vovo aBambu Kindo wa 1,500 i amehe tipa si rengbe na gu bange aboro naye tipa adunguratise nga gu nakio kina kumbatayo. *