LESIONY 1
Toib diitz ni noʼ nagach ni rony que rabaladxno
¿Noʼ ni ma góoch looy toib diitz ni noʼ nagach la?... * La Biblia raniʼ de toib diitz ni noʼ nagach «ni sieed de Dios». Nacni toib diitz nagach portín ni toib buñ rimbu láani. Dada ángeles goniiny nimbu más de láani. ¿Rioladxlo guimbulo xí láani ngú diitz ni goyoʼ nagach la?...
Xpensarylo, ¿xí láani goniiny ángeles ñan?
Ma xidzú tiemp de goló bisaʼ Dios primer buñguieeu né primer buñgonaʼ, né góc laayibu Adán né Eva. Dios biduidy toib lagary móz ni góc laa Edén par nabésyibu. Pal Adán né Eva nasobyibu Dios, layibu né xiinyibu labúu ñonyibu guidopynac Gudxlio toib lagary móz xomod góc Edén. Né labúu nabanyibu lainy lagary móz reʼ por tipzó. ¿Rasetnaladxlo xí buny Adán né Eva la?...
Adán né Eva diti bisobdiitzyibu Dios, né por ngú diti nabanyno lainy lagary móz ló naareʼ. Per Dios ma goniʼ que guidopy Gudxlio gacni toib lagary móz né guirá buñ labúu guibany loni por tipzó né guiguaʼ goxt. Per ¿ximod narebuʼ ni Dios goniʼ gony? Por xidzú tiemp buñ diti gon xí láani, ¡goyoʼni nagach!
Órni Jesús bieed ló Gudxlio bisuidybu buñ par gan más de diitz nagach reʼ. Láabu goniʼbu de Gobierno xtuny Dios. Jesús gochbu buñ guinab lóo Dios par guieed Gobierno reʼ. Né láabu sonybu que Gudxlio guidxin gacni toib lagary móz.
¿Rabaladxlo ni ma nanlo diitz nagach reʼ la?... Guisetnaladxno que nosi buñ ni rasobdiitz a Jehová sabany ló Gudxlio móz. La Biblia rasuidy lóono de historias xtuny xidal buñguieeu né buñgonaʼ ni bisob a Jehová. ¿Rioladxlo ganlo más de layibu la?... Guisuidyno chú layibu né ximod gacno xomod layibu.
BÍIL LÁANI LÓ LA BIBLIA:
^ Párrafo. 3 Ló lesiony reʼ né ló stipnés ni sieed sabiʼlo que ro ralox tipnés galrranabdiitz sitnéni tzón puntos (...). Reʼ labúu guisagadzulo par que xiinienlo labúu guicapy.
