LESIONY 5
¿Xí nainy Dios gony né Gudxlio?
1. ¿Xigony bisaʼ Dios Gudxlio?
Jehová biduidy Gudxlio par buñ né láani nacní lagary ro rabésno. Primer buñgudxlio, Adán né Eva Dios diti bisaʼ layibu par nabés né nadalyibu guibá, ló dzúcu Dios ma bisaʼ ángeles par nabés guibá. (Job 38:4, 7) Por ngú, Dios bisaʼ Adán né goloʼ láabu lainy lagary sacroyen ni góc laa Edén. (Génesis 2:15-17) Jehová biduidy lagary que láabu né guirá xiimbu ni ñoʼ labúu nabany sacroyen por tipzó ló Gudxlio. Bíil Salmo 37:29; 115:16.
Dzú goyaʼ Edén láani gocni toib lagary más móz. Adán né Eva labúu ñoʼ xiinyibu né nadalyibu ló Gudxlio. Conforma dzú guidopynac Gudxlio né ni noʼ loni ñony mandaryibu láani né ñonyibu láani toib lagary móz. (Génesis 1:28) Gudxlio diti sadxin dzú guinitlóni. Por tipzó sácni lagary ro cués buñgudxlio. Bíil Salmo 104:5.
2. ¿Xigony Gudxlio diti nacní toib lagary móz ló naareʼ?
Adán né Eva diti bisobyibu Dios, por ngú Jehová bilák layibu de lagary sacroyen reʼ. Lagary reʼ binit né ni toib buñ rigaʼlni gonytzaay toib lagary móz mod gocni. La Biblia ná: «Gudxlio ma noʼni ladxña ni nac nigolú mal.»—Job 9:24. Bíil Génesis 3:23, 24.
¿Ma bialadx Jehová ni goniiny ñonybu dzú bisaʼbu buñgudxlio la? ¡Yaca! láabu ngú ni nap Guiránac galnadip. Ni ma goníbu sonybu láani. (Isaías 45:18) Jehová sony que guirá clas buñ guibany mod goniiny láabu nírcu. Bíil Salmo 37:11, 34.
3. ¿Ximod lagary móz sácni stoib xomod nírcu?
Gudxlio reʼ sac toib lagary móz xomod góc Edén, órni Jesús saló guicaʼ Mandary xtuny Dios. Ló Xtzú rodann Jehová, Jesús guisanir nisló ángeles xtuny Dios né guinitlóyibu guirá ni racaló a Dios. Ór cú Jesús guisieg Buñdzab por tipmil íz. Xcudx Jehová salaa ló Xtzú rodannbu portín Jesús sagonéz né salaa layibu. Sabanyibu sacroyen por tipzó ló Gudxlio móz. Bíil Revelación 20:1-3; 21:3, 4.
4. ¿Pu dzú guinitló galrrioop?
¿Pu dzú guinitló Dios cós mal ni noʼ ló Gudxlio? Jesús biduidy toib «señal» ni raduidy diitz que Xtzú rodann Jehová ma noʼni gahx. Guirá cós nadzuʼpy ni noʼ rony naganni par cués buñ galán, né ndeʼ raduidy diitz que ma rabésno ló dzú «ni ma guidubylagá gudxliogoxreʼ.» Bíil Mateo 24:3, 7-14, 21, 22.
Ló tipmil íz ni Jesús gony Mandary Gudxlio desde guibá, sanitlóbu galrrioop. (Isaías 9:6, 7; 11:9) Jesús diti nosi gony Mandary, láaca guisiaabu xcalkié ni nadxi a Dios. Scú láani, Dios saquiin Jesús par cué galguitz, galgoity né sonybu que ma diti sioʼx buñ. Bíil Isaías 25:8; 33:24.
5. ¿Chú guibany ló Gudxlio móz ni guiedra?
Lagary ro radop testigos xtuny Jehová sadzelo buñ ni nadxiʼ a Dios, né ni nainy guisuidy ximod guibaladx Dios
Guirá buñ ni rasob a Dios sabany ló Gudxlio móz. (1 Juan 2:17) Jesús bixel a guirá buñ ni racanal láabu par guiyopy buñdxo, né par ganyibu ximod cobioo Dios layibu. Ló naareʼ, Jehová casuidy xidalguixo buñ par guibany ló toib lagary móz ló Gudxlio. (Sofonías 2:3) Lagary ro radop testigos xtuny Jehová, buñ ni ma noʼ tzeʼel rasuidy ximod guiguaʼ más sacró né ximod gonladx xiin. Buñ ni ma noʼ xiin né mbiox, rony adoraryibu Dios toibsi né rasuidyibu ximod gacné diitz sacró ni sieed de Dios layibu. Bíil Miqueas 4:1-4.
