Xidal buñ ma diti riée xquidaʼ portín lagarycu diti noʼ chú racné né ragonés layibu par guibigyibu ronoʼ Dios. Por ngú, ¿xigony guidoplo né lóodo ni nacdo testigos xtuny Jehová? ¿Xí labúu guiduidyibu looy?

Sabaladxlo guidzaklo buñ ni ronladx né nadxiʼ saʼ. Ló xtzú Jesús, buñ ni cuanal láabu biguaʼ toibsi né bidop par buny adorar Dios, bisuidy Xtiitz Dios né buny animar saʼ (Hebreos 10:24, 25). Dzú bidopyibu né xhermanyibu sacró gosacyibu portín guirá herman góc ximigdxinyibu né gondxiʼdot saʼyibu (2 Tesalonicenses 1:3; 3 Juan 14). Lóodo racanaldo mod bunyibu né rasacdo sacró xomod gosacyibu.

Pal rasoblo litz ni sieed ló la Biblia sacnéni looy. Xomodca bidop buñ mod ná la Biblia, ló naareʼ buñguieeu, buñgonaʼ né mbioxien láaca ronydo scúca. Lóodo radopdo par guicadiagdo herman ni rabexatzay la Biblia ni racné lóodo guiendo ximod rarexa litz ni sieed loni, par guisobdo láani guirá dzú laʼga nabanydo (Deuteronomio 31:12; Nehemías 8:8). Guirá ni radop né lóodo labúu guiniʼ ni bieen órni noʼ ni ranabdiitz, láaca labúu goʼolyibu cánticos modreʼ guiniʼyibu ni noʼ lainy xcalnabanyibu (Hebreos 10:23).

Fe xtunylo sac nadipni lóo Dios. Toib xpiin Jesús ni góc laa Pablo bicaʼbu guiich ló toibtica congregación ni goyoʼ ló xtzúbu: «Raniiny naʼ guibíya lóoto [...] par gacnéto saʼto né fe ni naptó, fe xtunyno sacnéni lóono» (Romanos 1:11, 12). Ni gonynédo saʼdo diitz órni radopdo rony nadipni fe xtunydo. Né ndeʼ racné lóodo par diti guisiando Jehová.

¿Xigony diti rasaguel lo tzélo reunión ni gac xomal reʼ né stip looy guiduidylo cuent que scú nacní? Sabaladxdo ni looy guidxinlo ro radopdo. Diti saguiixlo ni tiplaʼ bidxiich.

• Reunión ni napdo órni radopdo, ¿xigony ronydo láani scú?

• ¿Ximod racné reunión ni rapdo?