Góoch lóodo xi bunylo dzú góclo mbiox.

Goola gudx Italia íz 1943. Guirá buchi né ná gooldo lainy toib gudxyen. Bixiosa góc campesin né láaca bunytzaaybu yac. Láabu né xinaʼya gocyibu buñ católico.

¿Xigony goniiny looy ñaclo sacerdote?

Órni góca mbioxien bioladxi ñaʼya mix par nacadiaga ni naniʼ sacerdote. Bioladxi xirudxbu né nigolú bidziguiaʼya ni rony sacerdotecu. Por ngú goniiny naʼ ñaca sacerdote. Órni gopa 13 íz, xinaʼya goyné naʼ ronoʼ toib internado ro rasuidyibu mbioxien par labúu gac sacerdote.

¿Bisuidylo la Biblia órni goyeelo scuel la?

Diti tampa. Órni gopa 15 íz, toibtica xomextriya bidudy naʼ toib libro de Evangelios ro sieed mod bibany Jesús órni goyoʼbu ló Gudxlio né biila láani xidal buelt. Órni gopa 18 íz goyaʼya gudx Roma né cú goyaʼya toib universidad, né papa buny mandary scuel reʼ. Lagarycu bisudi latín, griego, historia, filosofía, psicología né teología. Ná bisuidydo tipnés versículos ni sieed ló la Biblia de memory né bicadiagdo tipnés historias ni sieed ló la Biblia dzú doming per diti bisuidytzaydo la Biblia.

Órni goyoʼlo ló seminario, ¿láaca bisuidylo buñ la?

Xchiina gocni administrativo, per láaca bisudi stipnés decretos de Concilio Vaticano II.

¿Xigony diti biluladxlo ni rasuidy Iglesia?

Goyoʼ tzón razón: bibiʼya que Iglesia goyoʼni lad partid, bidudyibu lagary que sacerdotes né xpiinyibu ñony cós mal, né ni rasuidy buñ católicos diti sieedni ló la Biblia. Por ejemplo, ¿ximod toib Dios ni nap galrronladx labúu ñony castigar por tipzó a buñ ni ma goity? ¿Rioladx Dios que guiquiinno toib rosary par guinino ngúca ngúca la? *

¿Xí goloʼlo guiclo gonylo?

Gorudxaʼya né gonaba xcalrracné Dios; gosiiya toib Biblia de Jerusalén, ni laʼra bireʼ ló diitz italiano, né gosaló bisudi láani. Toib domig rosil, laʼga cabeʼya sotana xtuni después ni buni mix, bidxin chop buñguieeu ronoʼya. Gochbu ná que nacyibu testigos xtuny Jehová né biiydo diitz. Más de tip ór biiydo diitz de la Biblia né xi náni de religión ni rasuidy xinésni.

¿Xí bunylo pensary de Testigos?

Nigolú bidziguiaʼya mod raniʼyibu né mod raquiinyibu Biblia católica. Después toib Testigo ni laa Mario gosaló goyguen naʼ. Nigolú gopbu paseins naʼ, né guirá sábda ná cayac guiee goyguenbu naʼ las nueve rosil.

¿Né xí buny pensary stipnés sacerdotes ni goyguenyibu looy?

Goodxi layibu ñony compañeryibu naʼ, per diti bioladxyibu nasuidyibu la Biblia. Per naʼ la nigolú bioladxi. Portín casudi tipnés cós sacróyen. Por ejemplo, bienna xigony radudy Dios lagary tzoʼ cós mal né galrrioʼob, toib galrrasuidy ni diti bientzaaya.

¿Toibtica buñ ni gosanir ló xireligionlo góoch looy que diti guisuidylo la Biblia la?

Íz 1975 goyaʼya gudx Roma xidal buelt par ñaabi layibu xi casudi. Per biyopyibu mod par naslooybu naʼ que cachéya, per ni toibyibu biquiin la Biblia. Después 9 de enero íz 1976, bicaʼya toib guiich ronoʼ Iglesia né bixela láani gudx Roma ro goodxi layibu que ma diti nainy naʼ gaca buñ católico; chop govitz después bireʼya de seminario né goyaʼya primer reunión né testigos xtuny Jehová. Ndeʼ góc toib samblia ro radop xidal congregaciones. ¡Sacróyen gocni! Tigaagayibu gopyibu Biblia xtunyibu né biyopyibu guirá textos ni casetlaa ni catudy discurs.

¿Ximod gosac xfamilo ni bunylo?

Casi guiráyibu nigolú bidzuitz. Per después goona que toibtica de buchi láaca casuidy la Biblia né Testigos xtuny Jehová lainy gudx Lombardía, ni noʼ lad norte de Italia. Goyguenna láabu, né Testigos de lagarycu gocné naʼ par ñapa toib dxiin né toib lagary ro cuésa. Íz cuca góca testigo xtuny Jehová.

¿Rac arrepentirlo né ni ma bunylo la?

¿Arrepentir la? ¡Nipa balaquien! Ndeʼra ma noʼya gaxtiguié de Dios, portín ma bisudi chú láabu modpa rasuidy la Biblia, diti filosofías né costumbres ni rasuidy iglesia católica. Nigoreʼ ma labúu raniya né stipnés buñ ni roni crer portín ma naana que ni cayabi layibu nigolúni.