Ló artículo ni godudy, bisuidyno xi goniʼ Jesús gac. Ndeʼ raslooy que Gobierno xtuny Dios ma noʼni lainy guibá né Jesucristo nac Rey ló Gobierno reʼ.

La Biblia ná que órni Jesús gosaló buny mandary, nír bisalbu Buñdzab né xidemony ló Gudxlio. Layibu nosi ló Gudxlio labúu rony mandaryibu, por ngú nogoluʼ galnagan desde 1914 (Apocalipsis 12:7, 9).

Ná cayacxiroʼ cós mal ló gudxliogoxreʼ, Jesús ni nac Rey de Gobierno xtuny Dios, ma buny xidal cós tzaay par buñ. Láabu rasanirbu par guisuidybu buñ ni ná la Biblia ló guidopynac Gudxlio, xomod goniʼbu gacni, né ma gocnébu xidalguixo buñ guisuidy xilitz la Biblia né guisob ni náni (Isaías 2:2-4). Guirá buñreʼ ma bisuidy gony dxiin né midid, guibany sacró né xfamil né tzoʼ conforme né ni nap. La Biblia rasuidy layibu guibanyibu sacró, né rasuidyibu gacyibu buñ ni Dios rioladx par guibany ló Gobierno xtunybu.

Ná ma cayony mandary Jesús lainy guibá, buñ cayonyra mandary ló Gudxlio. Per Dios gochbu Jesús: «Gosaló buny mandary lad xi enemiglo» (Salmo 110:2). Mápa mer Jesús sanitló guirá xi enemig né sabeʼbu galnagan ni ratudy xpiin Dios ló galrrioʼob.

Ló tiempcu, Gobierno xtuny Dios sony ndeʼ:

• Sanitlóni religión falz. La Biblia raniʼ que religión falz nacni xomod toib gonaʼ yox ni mápa mer guinitló. Por ngú, guirá religión ni rasuidy galrrascú de Dios né ni ratudy buñ ló castig, sanitlóni. Xidal buñ sadziguiaʼ órni guinitlóni (Apocalipsis 17:15, 16).

• Sanitlóni gobiernos ni noʼ ló Gudxlio. Gobierno xtuny Dios sanitlóni guirá gobiernos (Apocalipsis 19:15, 17, 18).

• Sanitlóni buñ mal. ¿Xí sasaclóo ni diti ná guisian cós mal né ni diti ná guisob ni ná Dios? «Buñ mal sanitlóyibu ló gudxlio» (Proverbios 2:22).

• Sanitlóni Buñdzab né xidemony. Buñdzab né xidemony ma diti labúu sascúyibu buñ (Apocalipsis 20:3, 10).

¿Né xí sasaclóo buñ ni ná guibany xan xomandary Gobierno xtuny Dios?

Desde lainy guibá, Jesucristo sony xidal cós ni diti labúu rony buñgudxlio. Láaca 144.000 ungidos ni bireʼ lad buñgudxlio sacné láabu (Apocalipsis 5:9, 10; 14:1, 3). Sonybu ni ná Dios ló Gudxlio. ¿Xí sony Gobierno xtuny Dios por buñ?

• Sanitlóni galguitz né galgoity. «Ni toib buñ saniʼ: Caxoʼya» né «ma diti sioʼ galgoity» (Isaías 33:24; Apocalipsis 21:4).

• Sabanyno goxt né ma diti sadzuibyno. «Xiinlo sabany goxtiguie» né «tigaagayibu sabú xan labaa balach né xan yac higos, né diti sioʼ ni satzuiby layibu» (Isaías 54:13; Miqueas 4:4).

• Sioʼ dxiin sacróyen. «Guirá ni ma golúya sabaladxyibu por guirá xchiinyibu. Diti sonyibu dxiin xilaʼsi» (Isaías 65:22, 23).

• Gudxlio sácni toib lagary móz. «Yoolaʼ né yoovich sabaladx, né láach ni nabich sioʼ nakit né siálni xomod riál azafrán» (Isaías 35:1).

• Sasuidyni buñ par labúu guibany tipzó. «Ndeʼ radudy diitz guibany buñ tipzó: que guimbuyibu looy, toibguielot Dios ni nigolú, né guimbuyibu xiinlo Jesucristo ni bixelo» (Juan 17:3).

Dios raniiny que looy guicaʼlo guirá galnasác reʼ (Isaías 48:18). Ló artículo ni sieed sasuidylo xi labúu gonylo par labúu guicaʼlo galnasác reʼ ló dzú ni sietra.