Pórtico gocni niis roʼ goyoʼ buñ lainy templo né niiscu godudy buñ par bidxin cuart ni góc laa Santo. ¿Xí midid gopni? Antes de íz 2023, Traducción del Nuevo Mundo goniʼni ndeʼ ló 2 Crónicas 3:4: «Toibsi midid góc xilag pórtico né yoʼ: 20 codos, né nasoʼni 120». Tipnés traducciones láaca náni que pórtico góc nasoʼni «120 codos». ¡Ndeʼ bidudy diitz que gocni toib torre ni góc nasoʼ 53 metros (175 pies)!

Per, desde íz 2023, versículo reʼ bidzaʼni ló Traducción del Nuevo Mundo, né nigoreʼ náni: «Nasoʼni 20 codos», ni radudy diitz, midid 9 metros (30 pies). a Guibiʼno xigony bidzaʼ versículo reʼ.

Ló 1 Reyes diti ritlaa balac midid góc nasoʼ pórtico. Por ejemplo, ló 1 Reyes 6:3, Jeremías goniʼ balac codos góc xilagni né sioʼlni, per diti goniʼni balac midid góc nasoʼni. De ngú ló capítulo 7 rabexatzaybu stipnés cós ni bireʼ loguiaʼ ni gop templo, xomod guip ni noʼ nís lainy, chii camionguien né chop pilary de cobre ni goyoʼ nisló pórtico (1 Rey. 7:15-37). Pal nigolú ñac nasoʼ pórtico más de 50 metro, láani nareʼ loguiaʼni ló stipnés cós ni gop templo. Por ngú, ¿xigony diti bisetlaa Jeremías láani? Né láaca, xidalgoluʼ íz después, tipnés historiadores judíos bicaʼyibu que pórtico diti gocni más nasoʼ que stipnés cós ni gop templo xtuny Salomón.

Tipnés buñnan diti ronyibu crer que cueʼ yoʼ xtuny templo labúu nacalainyni midid nanaʼ toib pórtico ni nasoʼ 120 codos. Ló dzú ni see, guirá yoʼ ni nasoʼdii ni goyaʼ né guiee né basoʼyaiy, xomod niis ro goyoʼ buñ lainy templo xtuny Egipto, xilagdii bireʼ xan yoʼcu né conforma cayaʼs yoʼcu góc nabéni. Per templo xtuny Salomón diti goyaʼni modcu. Tipnés buñnan rony crer que cueʼ yoʼcu góc nanaʼlni midid xhoop codos, ni radudy diitz, 2,7 metros (9 pies). Toib buñnan ni nan ximod goyaʼ yoʼ ló dzú ni see Theodor Busink goniʼ ndeʼ: «Pal cueʼ yoʼ niis ro goyoʼ buñ lainy templo góc nanaʼlni xhoop codos, pórtico cu diti labúu ñac nasoʼni 120 codos».

Ralooyni goyoʼ toib galrraché órni góc copiar texto xtuny 2 Crónicas 3:4. Ná ló versículo reʼ, tipnés guiich gool náni «120», tipnés guiich gool ni labúu gapno confianz ló náni «20 codos», xomod Códice alejandrino (siglo quinto) né Códice ambrosiano (siglo sexto). ¿Ximod rarexa galrraché reʼ? Que ló diitz hebreo diitz tigayoʼ né codos moda toibsi mod racáni. Por ngú, sigory órni góc copiarni, buñ ni bicaʼ láani, bicaʼbu «tigayoʼ gaal» xalagary «gaal codos».

Ná galán gonyno rutirigaʼlni lóono par guientzaayno guirá ndeʼ né guislooyno modpa góc templo xtuny Salomón, ni más nainy ganno láani ngú ni góc representar templocu: templo espiritual xiroʼ xtuny Dios. ¡Balaati radudyno guixquix por ni biruʼ Jehová guirá xpiin par gony adorar láabu ló templocu! (Heb. 9:11-14; Apoc. 3:12; 7:9-17).