Gonyno xinésni: La Biblia ragonéstzay lóono né labúu gap buñ confianz láani
Pal órni ragoʼno guicno gonyno xinésni, nosi ragoʼno cuent ni ronyno pensary o ni rony pensary stipnés, dipa labúu gapno confianz que sarecaano galán. La Biblia rabexa xigony rac ngú, né raibyni lóono ximod guibanyno nakit né guisacno sacró. La Biblia ragonéstzay lóono né labúu gap buñ confianz láani.
RAQUIINNO QUE DIOS CONÉS LÓONO
Ló la Biblia, Jehová a Dios rabexa que buñgudxlio raquiin xcalrracnébu; diti goyaʼno par conésno lóocano (Jeremías 10:23). Por ngú, bidudybu la Biblia par gacnéni lóono cutzayno ni gonyno ló xcalnabányno. Nadxiʼgolubu lóono, por ngú diti nainy láabu tudyno ló galrrioʼob né ló galrrasaʼ ni rioʼ buñ ni diti rabútzay ni rony (Deuteronomio 5:29; 1 Juan 4:8). Láabu bisaʼbu lóono né napbu xiroʼ galnan, né rimbutzaaybu lóono, por ngú labúu radudybu consej ni gacné lóono (Salmo 100:3; 104:24). Per, Dios dipa rony lafuersbu buñ guisob ni rony mandarybu.
Jehová bidudybu Adán né Eva, primer buñguieeu né primer buñgonaʼ, guirá ni biquiinyibu par nabanyibu nakit (Génesis 1:28, 29; 2:8, 15). Láaca bidudybu biinreʼ tipnés instrucción senciysi ni goniiny nasobyibu, per bidudybu lagary que layibu naniʼyibu pal nasobyibu láani o yaca (Génesis 2:9, 16, 17). Nabanni, Adán né Eva más bioladxyibu nabanyibu mod raniiny layibu né diti mod ná Jehová (Génesis 3:6). ¿Né ximod rarecaa buñgudxlio órni stipláacayibu raniʼyibu xí láani xinésni? ¿Rieeni lóono galán la? Yaca. Guirá ni ma góc, raslooyni que órni diti rasobno ni rony mandary Dios, diti raguaʼno sacró nili rioʼno nakit por xiroʼ tiemp (Eclesiastés 8:9).
La Biblia ragonés lóono par gonyno xinésni, nac rotísi lagary ro rabésno o lagary ro sieelno (2 Timoteo 3:16, 17; bibiʼ cuadriyen ni laa « Toib libro par guiránac buñgudxlio»). Guibiʼno ximod ragonés Dios lóono né la Biblia.
Gon xigony xinésni ngú guinino que la Biblia nacni «Xtiitz Dios» (1 Tesalonicenses 2:13). Goyee ló jw.org né bibiʼ video ni laa ¿Chú bisaʼ la Biblia?
DIOS RAGONÉS LÓONO NÉ LA BIBLIA
La Biblia raibyni lóono mod bidzak Dios buñgudxlio ló guirá íz reʼ. Por ni rolno ló la Biblia, labúu ranno xi láani rabiʼ Dios cós tzaay né cós mal, ndeʼ radudy diitz, ni nanbu que sacné o sony mal lóono (Salmo 19:7, 11). Modcu radzelno principios ni dipa radudy xtzú né ni ragonés lóono dzúna dzú.
Por ejemplo, guibiʼno consej ni sieed ló Proverbios 13:20: «Buñ ni rasané buñ ni noʼ xcalrrien sadxin sac buñ ni noʼ xcalrrien, per ni radzak buñ ngaʼal sarecaa mal». Principio reʼ racnéni buñ ló naareʼ modpa gócneni buñ ló dzú ni see né nosi nacni toibtica de xidal consej ni racné né rasac ni radzelno ló la Biblia (bibiʼ cuadriyen ni laa « Consej ni radudy la Biblia guirá ór racnéni lóono»).
Pentzi guinabdiitzlo looyca: «¿Ximod labúu gapa confianz que mod ragonés la Biblia buñ ló naareʼ guirá ór raquiinni? Ló artículo ni sieed guisuidyno tipnés ejemplos.
a Laa Dios ngú Jehová (Salmo 83:18).
