Michelle: Xitalsa Sofía. Rabaladxi ni bidzela looy rioʼ.

Sofía: Scú, naʼ láaca rabaladxi ni cabiʼya looy.

Michelle: Nascú biaʼanno guinino ximod rasac Dios órni rabiʼbu lóono cadudyno ló galrrioʼob. * Looy gochlo naʼ que ma xidzúyen de goló ronylo galrranabdiitz cú looy, né máspa la, órni gosaclóo xinaʼlo desgrasy. ¿Ximod noʼbu?

Sofía: Noʼ dzú noʼbu sacró né noʼ dzú yaca, per nigoreʼ noʼbu sacró.

Michelle: Rabaladxi. Nagan mod cadudylo né xinaʼlo.

Sofía: Scú, rioʼ ór ranabdidza naʼca balac gaclano tudyno ló galrrioʼob.

Michelle: Wal rony buñ pensary modca. Sigory rasetnaladxlo que último buelt ni biiyno diitz, gonabdiidza looy ¿xigony radudy Dios lagary tudyno ló galrrioʼob janlo napbu galnadip par guinitlóbu láani la?

Sofía: Ajá, rasetnaladxi.

Michelle: Antes de ganno ximod rabexa la Biblia láani, nainy naʼ guisetlano tipnés puntos ni biiyno diitz nascú.

Sofía: Láaca láani.

Michelle: Nascú bisuidyno que toib buñguieeu ni rasetlaa la Biblia gonabdiitzbu láacabu xigony radudy Dios lagary tudy buñ ló galrrioʼob. Né Dios diti godilné láabu nili góoch láabu que diti napbu fe.

Sofía: Diti goona ngú.

Michelle: Láaca bisuidyno que Jehová diti rioladx órni rabiʼbu lóono cadudyno ló galrrioʼob. La Biblia ná que, ló dzú ni see, órni xcudxbu godudy ló galnagan, «ló tiemp ni godudybu ló galrrioʼob láaca bioʼobni láabu». * ¿Xí diti rialdó xcalnabanyno ni nanno que Dios láaca radudybu ló galrrioʼob né lóono la?.

Sofía: Scú pue.

Michelle: Né láaca nanno que, Dios nap xiroʼgolu galnadip, napbu ni guiquimbu par guinitlóbu galrrioʼob ortísi.

Sofía: Nga ni diti rienna. ¿Xigony radudy Dios lagary tudyno ló galrrioʼob janlo napbu galnadip par guinitlóbu láani la?

Michelle: Ganno xi rasetlaa Génesis, primerdiguieʼ libro ni rasetlaa la Biblia. ¿Rimbulo historia de Adán né Eva ro ritlaa de cuánnax ro diti bidudy Dios lagary layibu ñooyibu láani la?

Sofía: Scú, bisudi láani ló Catecismo. Dios góoch layibu que diti ñooyibu de toib yac cuánnax, per layibu diti bisobyibu.

Michelle: Scú láani. Per primer guibiʼno xi láani góc antes de ngú, radzakni né tema ni canino. ¿Nainy looy goʼolo Génesis, capítulo 3, versículos 1 a 5 la?

Sofía: Láaca lainy, náni: «Scú láani, beʼel gócmu nimal ni más mañós que stipnés nimal guiʼix ni bisaʼ Jehová. Órcu gonabdiitzmu buñgonaʼ: ¿Xí nigolúpa góoch Dios lóoto que diti non guáto xcaa guirá yac ni noʼ lainy lagary sacróyen la? Buñgonaʼ reʼ cuapy: Lóodo labúu guádo xcaa guirá yac ni noʼ lainy lagary sacróyen. Per xcaa yac ni sagaʼ galay lagary sacróyen, Dios goniʼ: Diti non guáto láani; yaca, diti non canto láani. Pal ronyto láani, saityto. Órcu beʼelcu góoch a buñgonaʼ: Dipa saityto. Portín, Dios nan que dzú ni guáto láani, dzúcuca saxal bisalóto né sacto xomod Dios, simbuto cós tzaay né cós mal».

Michelle: Guixquixi looy. Ganno xi ná versículos reʼ. Primer náni que toib beʼel goniné a Eva. Né stoib versículo náni que gócbu Buñdzab, láabu biquiimbu toib beʼel. * Beʼel reʼ gonabdiitzmu Eva de toib mandary ni góoch Dios layibu, que diti ñoobu de toib yac cuánnax. ¿Xí láani góoch Dios a Adán né Eva nasacloyibu pal diti nasobyibu?

Sofía: Que ñaityibu.

Michelle: Scú láani. Después de ngú, Buñdzab goni toib galrrascú rodann de Dios. Bibiʼ xi láani goniʼbu: «dipa saityto». ¡Goniʼbu que Dios rascú!

Sofía: Historia reʼpa la, dipa ma bicadiaga láani.

Michelle: Né órni goniʼbu que Dios rascú, Buñdzab bunybu que nareʼ toib galrranabdiitz ni naclagoluʼ par narexani. ¿Nanlo xigony la?

Sofía: Mmm... Yaca.

Michelle: Cuéxano láani modreʼ. Gonyno pensary que toibtica dzú raabi looy que más nadipa que looy. ¿Ximod naslooylo que diti nigolú ni caniya?

Sofía: Sigory né toib prueby.

Michelle: Scú láani. Labúu nayopyno toib cós ni nanaʼ né nabiʼno guidoni chú labúu nalís láani. Modreʼ diti nagan gan buñ chú más nap fuers.

Sofía: Bay nga la golú.

Michelle: Per ¿pal raniya que looy diti raniʼlo ni nigolú ga? Ndeʼ ma gadzé, ¿ja?

Sofía: Golú.

Michelle: Galnigolú diti labúu guislooy buñ láani ne xcalnadip.

Sofía: Bay nga la golú.

Michelle: Ni nacni la, nosi noʼ toib mod ni labúu naslooylo que raniʼlo ni nigolú pal nasianlo nadudy tiemp par nabiʼ stipnés buñ mod ronylo.

Sofía: Nigolú ni nálo.

Michelle: Guibiʼno historia ni ritlaa ló Génesis stoib. ¿Goniʼ Buñdzab que más nadipbu que Dios la?

Sofía: Yaca.

Michelle: Dios diti nasac nagan naslooy que láabu más nadipbu. Ni goni’ Buñdzab ngú que Dios biscú. Ló stoib diitz, Buñdzab gochbu Eva: «Láabu cascúbu looy, naʼ cayabi looy ni nigolú».

Sofía: Diti ma buni pensary nga.

Michelle: Dios nap galnan né gonbu que toib mod más galán par nacapybu Buñdzab, láani ngú nadudybu lagary nadudy xiroʼ tiemp. Modreʼ ñendxich chú ni biscú.

Sofía: Per órni goity Eva, biendxichni que Dios goni’ ni nigolú ¿ja?

Michelle: Labúu guinino que scú. Per ni goni’ buñdzab godiñani stipnés cós. Bibiʼ ni ná versículo 5 stoib. ¿Xí stoib cós góoch Buñdzab a Eva?

Sofía: Que pal ñoobu cuánnaxcu, naxal bisalóbu.

Michelle: Scú láani, pal ñoobu cuánnaxcu nadxin «ñacbu xomod Dios, nimbubu cós tzaay né cós mal». Modcu láaca bislooybu que Dios diti raniiny guidudy cós tzaay a buñgudxlio.

Sofía: Ahh.

Michelle: Ngú láaca góc toib galrrascú rodann.

Sofía: ¿Ximod? Diti rienna.

Michelle: Buny pensary ló ndeʼ Buñdzab bislooy a Eva né láaca godiñani a guirá buñgudxlio que más galán narecaani layibu pal diti nasobyibu Dios. Jehová láaca gon que más galán nadudybu tiemp Buñdzab par naslooybu pal nigolú ni caniʼbu. Por ngú bidudybu lagary Buñdzab ñony mandary por tidxósi tiemp ló Gudxlio. Né por ngú radudyno ló galrrioʼob: portín ni rony mandary Gudxliogoxreʼ ngú Buñdzab, diti Dios. * Per noʼ diitz sacró.

Sofía: ¿Diitz sacró la?

Michelle: Scú, la Biblia rasuidy toib cós sacróyen de Dios. Náni que Jehová noʼbu gaxtiguié de lóono órni cadudyno ló galrrioʼob. Por ejemplo, guibiʼno ni bicaʼ rey David ló Salmo 31:7. Láabu godudybu ló galrrioʼob laʼga bibanybu, bibiʼ xi gochbu Dios. ¿Nainy looy goʼolo versículo reʼ la?

Sofía: Scú, náni: «Nigolú sioʼya nakit né sabaladxi ló xcalnadxiʼlo ni diti raché né ni diti radudy xtzú, portín looy ma bibiʼlo xcalrrioʼoba; nanlo xi galrrasaʼ noʼya ló».

Michelle: Ná godudy David ló xiroʼgolu galrrioʼob, gosacbu sacró portín gonbu que Jehová bibiʼ guirá ni cadudybu ló. Né looyga, ¿rasialdóni xcalnabanylo ni nanlo que Jehová rabiʼ guiráni, dada cós ni rasioʼob xcalnabanyno ni diti labúu rien buñ la?

Sofía: Scú, racnéni naʼ.

Michelle: Láaca la Biblia rasetlaa que Jehová diti sadudy lagary lóono tudyno ló galrrioʼob por tipzó. Láaca rasuidyni lóono que mápa mer sanitló Dios gobierno xtuny Buñdzab, né sonycopybu guirá ni ma bixin Buñdzab dada galrrioʼob ni ma godudy xinaʼlo ló né looy. ¿Labúu guibigueta stoib xomal la? Par guislooya looy xigony labúu gapno confianz que mápa mer sanitló Dios guirá galrrioʼob ni radudyno ló.

Sofía: Láaca lainy, labúu guieedlo.