La Biblia diti nacni cuenunysi libro. Loni sieed consej ni radudy Dios lóono (2 Timoteo 3:16). Ni sieed ló la Biblia labúu sacnéni looy. Scú, la Biblia ná: «Xtiitz Dios nabanyni né napni galnadip» (Hebreos 4:12). Libro reʼ napni galnadip par guitzaʼni mod nabanylo de chop mod: radudyni consej buñ par gacnéni layibu guirá dzú, né láaca racnéni layibu guimbuyibu Dios né ni gonybu ló dzú ni sietra (1 Timoteo 4:8; Santiago 4:8).

Radudyni consej buñ par gacnéni layibu guirá dzú. La Biblia radudy xidal consej lóono né láaca sitnéni xidal temas.

• Mod guidzakno stipnés (Efesios 4:31, 32; 5:22, 25, 28, 33).

• Mod gacno buñ nasac (Salmo 37:8; Proverbios 17:22).

• Diti gacno buñyox (1 Corintios 6:9, 10).

• Diti guisobladxno bidxiich (Proverbios 10:4; 28:19; Efesios 4:28). *

Toib galtzeʼel de Asia bidudyibu cuent que consej ni sieed ló la Biblia nigolú racnéni buñ. Xomod rasaclóo buñ ni laʼra buñ galtzeʼel, gosac naganyibu ñaʼyibu né ñooyibu diitz né saʼyibu. Per gosaló bisobyibu ni bienyibu ló la Biblia. ¿Ximod gocnéni layibu? Vicent, ni nac buñguieeu rabexa láani modreʼ: «Ni biila ló la Biblia gocnéni naʼ par labúu cualóya nitisi galnagan lainy galtzeʼel. Ni rasobdo consej reʼ ronyni que guibaladxdo». Tzeelbu ni laa Annalou, raniʼ que scú nacni: «Ni bíildo de buñ ni rasetlaa ló la Biblia nigolú gocnéni lóodo. Nigoreʼ noʼya nakit por guirá metas ni napdo».

Racnéni lóono guimbuno Dios. Vicent diti nosi rasetlaa mod cayacné la Biblia láabu lainy xcaltzeelbu, láaca nábu: «Ni cayoola la Biblia rasac que noʼya más gaxtiguié de Jehová». Ni goniʼbu rabeʼ loguiaʼni ndeʼ: la Biblia labúu gacné looy guimbulo Dios. Pal ronylo láani scú, guirá consej ni radudyni diti nosi sacnéni looy, láaca sacnéni looy par gaclo ximigbu. Sienlo que ló Xtiitzbu la Biblia ritlaa que ló dzú ni sietra sabanyno más sacró, ro labúu guibanyno tipzó né sacrodiguieʼ (1 Timoteo 6:19). Diti noʼ stoib libro ro ritlaa ximod guibanyno ló dzú ni sietra nosi la Biblia.

Pal rasalólo roʼolo la Biblia né ronylo láani guirá ór, sabanylo goxt nigoreʼ né simbulo Dios. Per sigory órni goʼolo láani saplo galrranabdiitz. Órni guisaclo scú bisetnaladx de toib funcionario etíope ni ma nap más de chop mil íz de goló bibany. Diti bientzaaybu ni ná Escrituras. Felipe, ni góc xpiin Jesús, gonabdiitz láabu pal cayenbu ni cayoʼolbu, né láabu cuapybu: «¿Ximod labúu guienna láani janlo diti noʼ ni casuidy naʼ la?». Órcu bidudybu lagary que Felipe, ni nan rasuidy ñacné láabu (Hechos 8:30, 31, 34). Né scúca pal nainy looy guientzaaylo ni ná la Biblia, rony invitardo looy guistzalo toib formulario ni sieed ló jw.org o labúu guixelo guiich ló dirección ni riaʼan más gaxt ro rabéslo ni sieed ló revista reʼ. Láaca labúu guiyopylo testigos xtuny Jehová ni noʼ lagary ro rabéslo o labúu guiyopylo toib Salón del Reino. Ranabdo looy guiyopylo toib Biblia dzureʼca né bidudy lagary guitzaʼni mod nabanylo.