Samblia de tzón govitz íz 2020 dipa sialadxno láani. Por primer buelt, góc grabar programa reʼ toibsi midid par buñ ni noʼ ló guidopynac Gudxlio né biaʼpyni ló Internet. Per casi guirá xhermanno de Malaui né Mozambique bibiʼyibu samblia reʼ ná diti napyibu Internet. ¿Ximod?

 Comité de Coordinadores né Comité de Enseñanza xtuny Tidxó buñ ni nap xiroʼ Galnan, bidudyibu permís nadudy samblia reʼ ló radio né televisión lainy gudx Malaui né Mozambique. ¿Xigony gocni scú? Portín nigolú car noʼ Internet gudx Malaui. Goxeʼsi testigos xtuny Jehová nap Internet. William Chumbi, ni noʼ lad Comité xtuny Sucursal ni noʼ Malaui, ná ndeʼ: «Nosi ló radio né televisión labúu nacaʼ herman galrro espiritual reʼ». Luka Sibeko, stoib herman ni noʼ lad Comité xtuny Sucursal ni noʼ Malaui, ná: «Pal diti nadudyni ló radio né televisión, goxeʼyensi herman ni noʼ ló territorio reʼ labúu nabiʼ samblia». Ngúca rasaclóo gudx Mozambique. Goxeʼsi herman labúu rasiʼ toib teléfono o tableta, nili rigaʼlni layibu quiixyibu Internet.

 Ló tipnés estación de radio né canal xtuny televisión maca cadudy reunión ni rac guirá xomal, portín noʼ galguitz reʼ. a Herman gonab más ór par natudyibu samblia de tzón govitz.

 Per nanto la, lainy gudx Malaui xhermanno cualó tipnés galnagan. Estación de radio né canal xtuny televisión nosi radudy lagary guitudy buñ programa xtuny tip órsi, siaca guixacladx buñ láani. Órcu herman góoch layibu que dxiin ni ronyno racnéni guirá buñ. Ná ma diti labúu rareʼno lidxno, cadudyno oportunidad buñ guicadiag diitz sacró ni sieed ló la Biblia. Ndeʼ labúu gacné layibu gacyibu buñ ni natzaay xcalrrien né guibanyibu sacró né xfamilyibu. Órni bicadiagyibu ngú, gosaguelyibu natudy herman más ór programa xtuny.

 Lainy gudx Malaui, toib estación de radio né toib canal xtuny televisión bitudy samblia de tzón govitz. Xidal millón de buñ racadiag guiropcani lainy gudxcu. Lainy gudx Mozambique, 85 estación de radio né canal xtuny televisión bitudy samblia reʼ.

 Góc gaxt 28.227 dólares b par nadudy samblia ló televisión né yaaca 20.000 dólares par nadudyni ló radio lainy guiropca gudxropcu. Tigaaga estación de radio biax midid 15 né 2.777 dólares, ni gop más señal biax más.

 Xhermanno cuátzay cuidad mod góc gaxt donación ni bixelto. Por ejemplo, radio né televisión ni noʼ gudx Malaui gosaguel ñax más barat. Tipnésyibu dada bilit 30% ló ni riaxyibu. Dada biaʼan sobra 1.711 dólares. Tipnés emisoras ni noʼ lainy gudx Mozambique bilityibu ló ni biaxyibu portín nanyibu que testigos xtuny Jehová diti rabann né raguiix ór ni non quiix.

 Xhermanno nigolú bidudyibu guixquix portín labúu bibiʼyibu o bicadiagyibu samblia. Patrick, toib anciano ni noʼ lainy congregación gudx Malaui, goniʼ: «Radudydo guixquix Tidxó buñ ni nap xiroʼ Galnan por ni bidudyibu lagary nabiʼdo samblia». Stoib herman de gudx Malaui, ni laa Isaac, goniʼ: «Diti napdo ro guibiʼdo samblia. Por ngú nigolú raxquixdo lóoto portín labúu bicadiagdo samblia ló radio. Nacni toib galrrascad ni bidudy xcudx Jehová lóodo. Guiráca xfamila labúu bicadiag samblia. Nigoreʼ nantzaydo que Jehová ronladx xpiin».

 Toib publicador de Mozambique ni laʼra gop samblia íz 2020, goniʼ: «Órni bibiʼya samblia ló televisión, bisetnaladxi que Jehová nap xiroʼ galnadip. Pandemia reʼ diti bicaani láabu par nadudybu lóono galrro espiritual né dada bischinbu láani rioʼ. Bibiʼtzaya que xpiin Jehová ronladx saʼ, né nandxichi que ndeʼ nac religión ni rasuidy xinésni».

 Wyson ni nac anciano xtuny toibtica congregación goniʼ ndeʼ: «Nainy naʼ guidudi guixquix mós ni rony xinésni né naní xcalrrien portín ranyibu lóodo ló pandemia reʼ. Pen radudydo dzú né rabésdo toib lagary ro nogoluʼ galsii. Ná scú labúu bicadiagdo né bibiʼdo samblia ló radio né televisión, bioladxdo láani né nigolú gocnéni lóodo».

 Comité de Coordinadores né Comité de Enseñanza láaca bidudy permís que ló íz 2021 nadudy samblia ló radio né televisión lainy tipnés gudx. ¿Ximod riax guirá gaxt ni rac? Rareʼni ló donación ni radudyto par obra mundial. Xidal donación de clas reʼ radxinni ló donate.mr1310.com. Raxquixpado lóoto por guirá donación ni raxelto né guidopy xcalnabanyto.