Diitz griego ni sieed ló la Biblia «resurrección» nacni anástasis, ndeʼ radudy diitz xomod órni «rasagaʼ buñ, né riás buñ stoib». Órni riás toib buñ lad gueʼet, nacni suusi ñásbu stoib. Órni toib buñ riás lad gueʼet, nacni xomod ñásbu; rabanybu stoib xomodca dzú ni goitybu (1 Corintios 15:12, 13).

 Diitz resurrección diti sieedni ló Antiguo Testamento, o Escrituras Hebreas. Per ló la Biblia ritlaa que buñ siás lad gueʼet. Por ejemplo, Dios biquiin profeta Oseas, par bicaʼ ndeʼ: «Naʼ salaaya layibu de xcalnadip baʼ, salaaya layibu de galgoity» (Oseas 13:14; Job 14:13-15; Isaías 26:19; Daniel 12:2, 13).

 ¿Pu lagary guiás buñ ni ma goity? Tipnés buñ riásyibu lainy guibá par gacyibu reyes toibsi né Cristo (2 Corintios 5:1; Apocalipsis 5:9, 10). La Biblia ná que ndeʼ nac «primer resurrección», que Jesús gócbu primerdiguieʼ ni biás lad gueʼet (Apocalipsis 20:6; Filipenses 3:11). Guiropca diitz reʼ, raslooyni que noʼ stoib resurrección. Buñ ni guiás ló ni rarop resurrección, sabanyibu ló Gudxlio (Salmo 37:29).

 ¿Xí rac né buñ órni riás? Dios bidudybu galnadip a Jesús par guilísbu buñ ni ma goity (Juan 11:25). Né Jesús saquiimbu galnadip cú par guilísbu «guirá ni noʼ lainy baʼ», salísbu buñ xomodpa góc buñ dzú ni goity né sonybu que buñreʼ guisetnaladx xidal cós (Juan 5:28, 29). Guirá ni guiás par guibany ló Gudxlio sabanyibu goxtiguie portín diti saxoʼyibu (Isaías 33:24; 35:5, 6). Né buñ ni guiás par guibany lainy guibá, sacaʼyibu toib «cuerpo espiritual», ndeʼ radudy diitz sacyibu seres espirituales (1 Corintios 15:42-44, 50).

 ¿Chú layibu guiás? La Biblia rasuidy que ló Gudxlio «siás gueʼet ni buny xinésni né ni diti buny xinésni» (Hechos 24:15). Lad buñ ni buny xinésni sioʼ buñguieeu né buñgonaʼ ni dipa bisian a Jehová xomod Noé, Abrahán né Sara (Génesis 6:9; Hebreos 11:11; Santiago 2:21). Lad guirá buñ ni diti buny xinésni sioʼ buñ ni dipa bimbu ni rony mandary Jehová.

 Né guirá buñ ni diti rasob ni ná Dios, ni dipa rasian cós mal ni rony, diti siásyibu lad gueʼet. Órni guirá buñ reʼ gaity, saityibu por tipzó (Mateo 23:33; Hebreos 10:26, 27).

 ¿Pu dzú guiás buñ ni ma goity? La Biblia bisetlaa que resurrección ni saló lainy guibá sácni órni ma noʼ Cristo, ndeʼ gasaló íz 1914 (1 Corintios 15:21-23). Resurrección ni gac ló Gudxlio sácni órni gony mandary Jesucristo por Tipmil íz, órni Gudxlio guidxin gac toib lagary móz (Lucas 23:43; Revelación 20:6, 12, 13).

 ¿Noʼ razón par guiluladxno que sioʼ resurrección la? Scú. La Biblia nanoydiguieʼ rasetlaa gaʼ resurrección ni góc, ló guirá ndeʼ goyoʼ buñ ni bibiʼ que gocni (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Toibtica de guirá resurrección reʼ láani ngú ni biás Lázaro lad gueʼet. Buñguieeu reʼ ma sanébu tap govitz de goló goitybu, Jesús golís láabu lad xidalguixo buñ (Juan 11:39, 42). Nili xi enemig Jesús diti labúu naniʼ que scú gocni, né biyopyibu mod nagaityibu Jesús né Lázaro (Juan 11:47, 53; 12:9-11).

 Mod ná la Biblia, Dios nap galnadip par guilísbu buñ ni ma goity. Jehová dipa rialadx mod nac toib buñ, rasetnaladxbu xipa mod góc tigaaga buñ. Láaca napbu Xiroʼgolu galnadip, diti noʼ chú labúu guicaa láabu par guilísbu buñ ni ma goity (Job 37:23; Mateo 10:30; Lucas 20:37, 38). Per diti nosi labúu guilísbu buñ ni ma goity, xalagary ngú raniiny gonybu láani. «Saniiny guibiʼlo dxiin ni bunylo né ñalo» (Job 14:15). Modreʼ rasetlaa la Biblia ni guisac Dios órni guilísbu buñ lad gueʼet par guibany ló Gudxlio.

Ni raniʼ buñ de resurrección

 Tipnés buñ ná: Órni buñ riás lad gueʼet, alma ni diti raity racni toibsi né cuerpo xtuny buñ.

 Ni nigolú: Ló la Biblia, toib alma nacni buñ; diti nacni alga ni diti raity órni raity buñ (Génesis 2:7; Ezequiel 18:4). Órni buñ riás lad gueʼet, diti racni toibsi né cuerpo xtuny buñ, xalagary ngú nacni buñcu ni goity.

 Tipnés buñ ná: Tipnés buñ ni guiás lad gueʼet saityibu órcuca.

 Ni nigolú: La Biblia ná que ni «buny cós mal siás par gac juzgar layibu» (Juan 5:29). Per guirá buñcu sac juzgaryibu de guirá cós ni gonyibu después ni ma biásyibu diti ni bunyibu antes de ñaityibu. Jesús goniʼ: «Gueʼet sienyibu xirudx Xiin Dios, né guirá buñ ni guisob sabanyibu» (Juan 5:25). Pal buñ ni guiás lad gueʼet sienyibu xirudx Cristo o guisobyibu xcalrrasuidy Cristo, laayibu sacaani ló «rollo xtuny vida» (Apocalipsis 20:12, 13).

 Tipnés buñ ná: Buñ ni guiás lad gueʼet siásyibu né cuerpo ni gopyibu antes.

 Ni nigolú: Órni buñ raity cuerpo xtunybu raxinni né racni yoo (Eclesiastés 3:19, 20).